Waafrika weupe wa Afrika Kusini wahamia Marekani kama wakimbizi

Wazungu 49 wa kwanza wenye asili ya Afrika Kusini waliochukuliwa kuwa ''waathiriwa wa ubaguzi wa rangi'' na waliopewa hadhi ya ukimbizi chini ya pendekezo la Rais wa Marekani Donald Trump wameanza safari kuelekea Marekani Jumatatu.

Serikali ya Marekani imezuia idadi kubwa ya wakimbizi wasio wazungu kutoka sehemu mbalimbali za dunia lakini inawapa kipaumbele Waafrikana, vizazi vya wakoloni wengi wa Uholanzi wanaoishi Afrika Kusini.

Kutoa hadhi ya ukimbizi kwa Wazungu wa Afrika Kusini kumekumbwa na hisia tofauti kutoka mamlaka za Afrika Kusini, ambazo zinasema utawala wa Trump umeingia katika suala la kisiasa la ndani ambalo halielewi.

Inakuja wakati wa mvutano mkubwa wa kikabila nchini Afrika Kusini kuhusu ardhi na ajira ambao umewagawanya raia.

Ndege ya kukodi iliyowabeba 49 kutoka Johannesburg ilitarajiwa kuwasili katika uwanja wa ndege wa Washington Dulles Jumatatu asubuhi.

"Serikali inasema bila shaka kwamba hawa si wakimbizi," msemaji wa Wizara ya Mambo ya Nje ya Afrika Kusini Chrispin Phiri alikiambia kituo cha habari Afrika Kusini.

"Lakini hatutasimama katika njia yao."

Licha ya kuanzishwa kwa demokrasia ya vyama vingi nchini Afrika Kusini mwaka 1994, Wazungu wachache waliokuwa wakitawala mara moja wamebaki na utajiri mkubwa wa mali iliyokusanywa chini ya ukoloni na ubaguzi wa rangi.

Wazungu bado wanamiliki robo tatu ya ardhi binafsi na wana takriban mara 20 ya utajiri wa Weusi walio wengi, kulingana na jarida la kimataifa la kitaaluma la Review of Political Economy.

Chini ya 10% ya Waafrika Kusini Weupe hawana kazi, ikilinganishwa na zaidi ya theluthi moja ya wenzao Weusi.

Hata hivyo, madai kwamba Waafrika weupe wa Afria Kusini walio wachache wanakabiliwa na ubaguzi kutoka kwa Weusi walio wengi yamekuwa kivutio kikubwa katika mazungumzo ya mtandaoni ya mrengo wa kulia, na yameungwa mkono na mshirika mzungu wa Trump mzaliwa wa Afrika Kusini Elon Musk.

Tangu kurejea kwake Ikulu ya White House mwezi Januari, Trump amekata misaada yote ya kifedha ya Marekani kwa Afrika Kusini mwezi uliopita, akitaja kutoridhishwa kwa sera yake ya ardhi na kesi yake ya mauaji ya kimbari katika Mahakama ya Kimataifa ya Haki dhidi ya mshirika wa Washington, Israel.