Watu kadhaa waliuawa baada ya askari wa Uganda, Sudani Kusini kupigana karibu na mpaka

Jeshi la Uganda limekabiliana na vikosi vya kijeshi vya Sudan Kusini, maafisa walisema Jumanne.

Uganda imekuwa mshirika wa muda mrefu wa kijeshi wa Rais wa Sudan Kusini, Salva Kiir, na ilitangaza mwezi Machi kuwa imepeleka vikosi maalum nchini humo.

Mapigano ya Jumatatu yalihusisha Vikosi vya Ulinzi vya Watu wa Uganda (UPDF) na kikosi cha jeshi la serikali ya Sudan Kusini katika Jimbo la Equatoria ya Kati, karibu na mpaka wao wa pamoja.

"Vikosi kutoka majeshi ya Jamhuri mbili za ndugu, Sudan Kusini na Uganda, vilibadilishana risasi" katika Kaunti ya Kajo Keji, jeshi la Sudan Kusini lilisema katika taarifa.

'Vifo na Majeruhi'

Taarifa hiyo ilisema mkuu wa majeshi wa Sudan Kusini alizungumza na mwenzake wa Uganda kuhakikisha mapigano yanasitishwa na uchunguzi kufanyika kuhusu jinsi mapigano hayo yalivyoanza.

Taarifa kutoka kwa wawakilishi wa Kaunti ya Kajo Keji ilisema "shambulio hilo limesababisha vifo na majeruhi kutoka pande zote mbili."

Wawakilishi hao walisema maelfu walilazimika kukimbia makazi yao na sasa "wanahifadhiwa kwenye vichaka, maeneo ya kidini na shule za mitaa."

Uganda ilituma wanajeshi kusaidia Rais Salva Kiir wakati vita vya wenyewe kwa wenyewe vilipozuka nchini humo mwaka 2013, miaka miwili tu baada ya kupata uhuru kutoka Sudan.

Vita kati ya Kiir na makamu wake, Riek Machar, vilidumu kwa miaka mitano na kusababisha vifo vya watu wapatao 400,000 kabla ya makubaliano ya kugawana madaraka kufikiwa mwaka 2018.