Nijar ta fara sayar da uranium da ta karɓe daga kamfanin Faransa a kasuwar duniya

Gwamnatin Nijar ta sanar cewa ta fara sayar da uranium da kamfanin Somair, wanda kamfanin Faransa Orano ke da hannu a cikinsa, ya haƙo kafin gwamnatin ƙasar ta karɓi ikon sarrafa shi.

An bayyana hakan ne a wani rahoto da gidan talabijin na ƙasar Tele Sahel ya fitar a yammacin Lahadi, inda ya ambato kalaman shugaban ƙasar, Janar Abdourahamane Tiani.

A cewar Tiani, Nijar na amfani da haƙƙinta na sarrafa ma’adinanta ta hanyar sayar da uranium ga duk wanda yake son saya bisa dokokin kasuwa.

Batun haƙar uranium ya zama babban rikici tsakanin gwamnatin da ta karɓi mulki bayan juyin mulkin 2023 da kamfanin Orano na Faransa, wanda gwamnatin Faransa ke da kaso mafi yawa a cikinsa.

Tun bayan juyin mulkin, Nijar ta fara karkata zuwa ga Rasha domin neman tallafin tsaro da kuma haɓaka harkokin ma’adinai. A watan Yuli ma, Ministan Makamashin Rasha Sergei Tsivilev ya bayyana cewa Moscow na da sha’awar haƙar uranium a Nijar.

A shekarar 2024 ne gwamnatin Nijar ta ƙwace ikon wasu manyan mahaƙar uranium guda uku daga kamfanin Orano, wato Somair da Cominak da kuma Imouraren, waɗanda ake ganin suna cikin manyan wuraren uranium a duniya.

Sai dai kamfanin Orano, wanda ke da kusan kashi 60 cikin 100 na hannayen jarin wasu daga cikin waɗannan kamfanoni, ya shigar da ƙorafe-ƙorafe domin ƙoƙarin sake samun ikon sarrafa su.

Alƙaluma daga hukumar makamashin nukiliya ta Turai, Euratom, sun nuna cewa a shekarar 2022 Nijar ta samar da kusan kashi ɗaya cikin huɗu na uranium da ake amfani da shi a tashoshin nukiliyar Turai.

Tushen labari: Newstimehub