Ta tsere daga yakin basasa a Somalia, ta isa Amurka a matsayin ’yar gudun hijira, amma daga baya ta zama ɗaya daga cikin fitattun ’yan siyasar da ake yawan muhawara a kansu. Yanzu, Ilhan Omar na fuskantar sabon ƙalubale.
Ta tsere daga yakin basasa a ƙasarta ta haihuwa. Ta isa Amurka a matsayin ’yar gudun hijira. A yau, tana cikin fitattun ’yan siyasar da ake yawan cece-kuce a kansu, waɗanda kuma ra’ayoyinsu ke tasiri a muhawarar siyasar Amurka.
Wace ce Ilhan Omar? Ta yaya wata yarinya ’yar Somalia da ta isa Amurka tun tana ƙarama ta zama ’yar Majalisar Wakilan Amurka? Kuma me ya sa matsayarta ta siyasa ke ci gaba da haifar da zazzafar muhawara?
An haifi Ilhan Omar a Mogadishu, babban birnin Somalia, a shekarar 1982.
Lokacin da yakin basasa ya mamaye ƙasarta, ita da iyalinta sun tsere domin neman mafaka. Bayan sun shafe shekaru a wani sansanin ’yan gudun hijira a Kenya, sun isa Amurka a shekarar 1995.
A shekarar 1997, iyalinta suka koma birnin Minneapolis da ke jihar Minnesota. Daga baya, birnin ya zama cibiyar rayuwarta ta siyasa.
Omar ta fara shiga harkokin ci gaban al’umma da siyasa, inda ta fara aiki a kamfen-kamfen zaɓukan yankuna. A shekarar 2016, ta lashe zaɓen zama ’yar Majalisar Dokokin jihar Minnesota.
Sai dai nasarar da ta fi jawo mata suna ta zo ne bayan shekaru biyu.
A shekarar 2018, an zaɓi Ilhan Omar a matsayin ’yar Majalisar Wakilan Amurka. Hakan ya sa ta zama Ba’amurkiya ’yar asalin Somalia ta farko da ta shiga majalisar, kuma ɗaya daga cikin mata biyu Musulmai da suka fara zama ’yan majalisar a wannan lokaci.
Zamanta a majalisar ya zama wani muhimmin al’amari ga al’ummomin bakin haure da Musulman Amurka da dama. A wajensu, nasararta ta nuna cewa mutanen da suka taɓa kasancewa baƙi a ƙasar za su iya shiga harkokin siyasa har su wakilci al’umma a matakin ƙasa.
Tsarin siyasarta ya karkata ga ra’ayin sauyi mai zurfi. Tana goyon bayan samar da tsarin kiwon lafiya mai sauƙin kuɗi, faɗaɗa tallafin zamantakewa, kare haƙƙin ’yan gudun hijira da sauya wasu manufofin harkokin wajen Amurka.
Duk da haka, tasirin Omar bai tsaya ga manufofin da take goyon baya ba.
A yayin da magoya bayanta ke kallonta a matsayin ’yar siyasa da ke ƙalubalantar tsoffin hanyoyin tafiyar da siyasa da kuma ɗaga muradun al’ummomin da ba a cika jin muryoyinsu ba, masu sukar ta na ganin cewa wasu daga cikin matsayarta, musamman kan manufofin ketare da Isra’ila, na haifar da rarrabuwar kawuna.
A tsawon rayuwarta ta siyasa, Omar ta sha arangama da abokan hamayya, ciki har da Shugaban Amurka Donald Trump da ’yan Majalisar Wakilai na jam’iyyar Republican.
Sukar da take yi wa Isra’ila da kuma wasu manufofin harkokin wajen Amurka sun jawo mata kulawa sosai daga kafafen yaɗa labarai da sauran masu ruwa da tsaki a siyasar ƙasar.
Wannan ya sa sunanta ya zama wani ɓangare na muhawarar da ta shafi manufofin Amurka a ƙasashen waje, rawar da ’yan majalisa ke takawa da kuma yadda ake kallon ’yan siyasa masu ra’ayoyi daban-daban.
A watan Oktoba na shekarar 2026, Omar na fuskantar wani sabon ƙalubale bayan jami’an binciken gwamnatin Amurka sun kai samame gidanta da ke Washington.
A cewar bayanan da aka bayar, samamen na da alaƙa da wani bincike kan zarge-zargen da suka shafi takardun hijirarta zuwa Amurka da kuma takardun da ta yi amfani da su wajen zama ’yar ƙasar Amurka shekaru da dama da suka gabata.
Binciken ya jawo tambayoyi kan dalilin gudanar da shi a wannan lokaci da kuma yadda yake gudana, musamman yayin da ake tunkarar zaɓe.
Omar ta musanta aikata wani laifi, tare da bayyana binciken a matsayin barazanar siyasa.
Sai dai batun ya sake jefa ta cikin muhawara kan rayuwarta, matsayinta a siyasar Amurka da kuma yadda ake gudanar da bincike kan ’yan siyasa masu tasiri.
Labarin Ilhan Omar ya wuce na wata ’yar siyasa guda. Labari ne na gudun hijira, neman mafaka, shigarsu cikin sabuwar al’umma da kuma sauyin da ke faruwa a tsarin siyasar Amurka.
Magoya bayanta na kallonta a matsayin matar da ta ƙalubalanci tsarin siyasa na gargajiya tare da bayyana muradun wasu al’ummomin tsiraru. A nasu ɓangaren, abokan hamayyarta na kallonta a matsayin ’yar majalisa wadda kalamanta da manufofinta ke shafar muhimman batutuwan siyasar ƙasar.
Duk da bambancin ra’ayoyi a kanta, Omar ta zama ɗaya daga cikin mutanen da ake amfani da su wajen muhawara kan wasu manyan tambayoyin da ke fuskantar Amurka.
Wa ya cancanci zama ɗan ƙasa? Wa ke da damar bayyana ra’ayinsa a dandalin siyasa? Kuma me hakan ke nufi idan wanda ya taɓa zama ɗan gudun hijira ya samu kujera a cibiyar ikon siyasa?
Ga Ilhan Omar, waɗannan tambayoyi ba batutuwan tunani kawai ba ne. Sun zama wani ɓangare na labarin rayuwarta, kuma suna da alaƙa da muhawarar da Amurka ke yi kan kanta da makomarta.
Turkiyya da Belgium Za Su Gudanar da Taron Ministoci Karo na Hudu a Brussels
Turkiyya da Belgium za su gudanar da taron ministoci karo na hudu a ranar Talata 20 ga watan Oktoba a Brussels domin tattauna batutuwan tsaro da hadin gwiwa.
Iran ta ce Netanyahu na ingiza Amurka ga wani yaƙi don kauce wa zaman kurkuku
Ministan harkokin wajen Iran Abbas Araghchi ya ce Netanyahu na caca da makomar Isra'ila, yana mai ƙarawa da cewa yunƙuri na baya na samun galaba kan Iran ya ƙara mata ƙarfi ne.
Gwamnatin Nijar ta haramta fitar da man fetur da gas zuwa ƙasashen waje
Wannan matakin na zuwa a daidai lokacin da ake fama da ƙarancin mai a gidajen man babban birbin ƙasar Yamai da ma wasu biranen ƙasar.
An kiyaye duk haƙƙoƙi. Newstimetr © 2026
