Kwale-kwale dauke da ‘yan ci-rani ya kife a kusa da Senegal, mutum 21 sun rasu, in ji hukumomi

Akalla mutane 21 ne suka mutu bayan wani jirgin ruwa da ke ɗauke da baƙin-haure ya nutse a cikin teku a arewa maso yammacin Senegal, a sabon mummunan al'amarin da ya faru kan hanyar tekun Atlantika da baƙin-haure ko ‘yan ci-rani ke bi daga Afirka zuwa Turai, a cewar hukumomi.

Ma'aikatar Harkokin Cikin Gida ta Senegal a cikin wata sanarwa ta bayyana cewa baya ga gawarwaki 21 da aka gano, mutum guda ne kawai aka samu da rai aka ceto.

Ma'aikatar ta ce adadin waɗanda suka mutu wanda aka sanar adadi ne na wucin-gadi sakamakon ana ci gaba da aikin neman waɗanda suka ɓace, tare da ba wa iyalan waɗanda abin ya shafa taimako.

Rahotannin kafafen yaɗa labarai sun ce jirgin ya kife ne a ranar Asabar a gabar tekun Loumpoul, da ke yankin Kebemer, tsakanin babban birnin Dakar da birnin Saint-Louis da ke arewacin ƙasar.

An kama ‘yan ci-rani da dama

Jaridar Le Soleil ta ruwaito cewa mafi yawan waɗanda abin ya shafa sun fito ne daga yankunan Leona da Thieppe, waɗanda ke cikin wannan yanki na Kebemer.

A ranar Asabar, hukumomin Senegal sun kuma bayyana cewa sun tare ‘yan ci-rani 142, ciki har da mata da yara, waɗanda ke cikin wani ƙaramin jirgin ruwa da ke ƙoƙarin isa ƙasar Spain.

Dubban mutane daga ƙasashen Afirka Yammacin Afirka ne suka mutu a cikin 'yan shekarun nan yayin ƙoƙarin isa Turai ta hanyar tekun Atlantika mai haɗari, domin isa tsibiran Canary na ƙasar Sifaniya.

TRT Afrika — TRT Afrika