Amurka za ta saka wa Sudan takunkumi kan zargin amfani da makamai masu guba

Amurka ta sanar da cewa za ta ƙaƙaba wa Sudan takunkumi bayan ta ‘‘gano” cewa gwamnatin Sudan ta yi amfani da makamai masu guba a shekarar 2024 yayin rikicinta da dakarun Rapid Support Forces (RSF).

Ma’aikatar Harkokin Wajen Amurka a wata sanarwa da ta fitar ta ce ta gano cewa gwamnatin Sudan ta saɓa wa Yarjejeniyar Makamai Masu Guba ta CWC, an gabatar da ita a hukumance ranar Alhamis, a cewar wata sanarwa daga Ma’aikatar Harkokin Wajen Amurka.

"Bayan wa’adin kwanaki 15 na sanarwa daga Majalisar Dokoki, Amurka za ta kakaba wa Sudan takunkumi, wanda ya haɗa da kan fitar da kayayyaki daga Amurka zuwa Sudan da kuma samun damar amfani da lamunin gwamnatin Amurka," in ji sanarwar.

Yaduwar makamai masu guba

"Amurka na kira ga Gwamnatin Sudan da ta daina amfani da makamai masu guba kuma ta cika alkawuranta karkashin yarjejeniyar CWC. Amurka ta himmatu wajen tabbatar da cewa waɗanda ke da hannu wajen yaɗuwar makamai masu guba sun fuskanci hukunci," in ji Ma’aikatar Harkokin Wajen.

Ana sa ran takunkumin zai fara aiki a ranar 6 ga watan Yuni, bayan an wallafa shi a cikin kundin bayanai na Amurka. Gwamnatin Sudan ba ta yi wani tsokaci a bainar jama’a kan wannan matakin na Amurka ba.

A baya, Amurka ta kakaba wa wasu mutane daban-daban takunkumi saboda rawar da suka taka a yakin na Sudan.

Wannan matakin na Amurka ya zo ne a daidai lokacin da sojojin Sudan ke samun nasarori kan dakarun Rapid Support Forces (RSF), inda suka sake kwace wasu yankuna, ciki har da babban birnin kasar Khartoum.

Tun daga watan Afrilu na shekarar 2023, RSF ke gwabza fada da Rundunar Sojojin Sudan don samun iko da kasar, wanda ya haifar da mutuwar dubban mutane da kuma jefa duniya cikin ɗaya daga cikin mafi munin rikicin jin kai.

Fiye da mutum 20,000 sun mutu, yayin da aka raba mutane miliyan 15 da muhallansu, a cewar Majalisar Dinkin Duniya da hukumomin cikin gida.