Wabunge 40 Kenya wafungiwa ofisi kwa kushindwa kulipa kodi

Wabunge 40 walishangazwa Jumatatu walipokatazwa kuingia katika ofisi zao bila onyo katika Kituo cha Mikutano cha Kimataifa cha Kenyatta (KICC).

Tukio hilo liliwaacha wakiwa wamekwama kwenye lango kuu, wakishindwa kufikia sehemu walizopangiwa za kufanyia kazi au hata kutumia huduma za msingi kama vyoo.

Pia walioathiriwa ni wafanyakazi wa usaidizi na maafisa wengine wa bunge wanaoendesha shughuli zao kutoka jengo hilo, wengi wao wakilazimika kurejea nyumbani.

Kulingana na KICC, bunge lina malimbikizo ya zaidi ya dola 393,593 (KSh 50,770,421.57), na kulazimu uongozi wa jumba hilo kuchukua hatua hiyo kali hadi deni hilo litakapolipwa.

Katika barua iliyotumwa kwa maseneta, Ikulu ilikubali hali hiyo mbaya, na kuwahakikishia kuwa hatua zinachukuliwa kutatua suala hilo haraka.

Kamati ya usalama ya bunge, katika barua rasmi ya Ijumaa, Mei 9 na iliyotumwa kwa Afisa Mkuu Mtendaji wa KICC James Mwaura, ilikuwa imeomba kuhurumiwa na kuomba kufunguliwa mara moja kwa majengo ili kuruhusu wabunge kurejea kazini huku juhudi za kulipa deni lililosalia zikiendelea.

"Mwaka huu wa kifedha pekee, PSC tayari imelipa kodi ya zaidi ya dola milioni moja (KSh 134 milioni), zaidi ya dola 565,000 (KSh 73 milioni) kwa kipindi cha 2023/2024 na zaidi ya dola 472,000 (KSh 61 milioni kwa mwaka huu wa kifedha hadi Disemba 2024," barua hiyo ilisoma.

Lakini bado Halmashauri ya KICC iliamua kuwazuia wabunge hao kuingia mpaka deni litakapolipwa.