Umoja wa Afrika umesitisha uanachama wa Guinea-Bissau kufuatia mapinduzi ya kijeshi

Shirika la habari la AFP limeripoti kuwa Umoja wa Afrika (AU) umesitisha uanachama wa Guinea-Bissau kufuatia mapinduzi ya kijeshi yaliyotokea wiki hii katika nchi hiyo ya Afrika Magharibi.

AU iliamua “kuiondoa Guinea-Bissau kwenye vyombo vyake vikuu vya maamuzi mara moja,” alisema mwenyekiti wa Tume ya AU Mahamoud Ali Youssouf kwa shirika la habari la AFP.

Haya yanajiri baada ya Jumuiya ya Kiuchumi ya Mataifa ya Magharibi (ECOWAS) pia kuiondoa Guinea-Bissau siku ya Alhamisi kutoka kwenye vyombo vyake vya maamuzi kufuatia mapinduzi ya kijeshi yaliyomtoa madarakani Rais Umaro Sissoco Embalo.

Uamuzi wa Baraza la Usuluhishi na Usalama (MSC) la jumuiya hiyo ulijitokeza baada ya Mkutano wa Dhahiri wa Hali ya Dharura wa Wakuu wa Nchi na Serikali uliofanyika kwa njia ya mtandao kujadili hali ya kisiasa ilivyo nchini humo.

Mkutano huo uliokuwa ukiongozwa na Rais wa Sierra Leone na Mwenyekiti wa ECOWAS, Julius Maada Bio, ulionyesha wasiwasi mkubwa juu ya mzozo wa kisiasa unaoendelea Guinea-Bissau na uliwahimiza majeshi ya nchi hiyo kurudi kazini na kudumisha jukumu lao kikatiba.