Trump ya sauke Jakadan Amurka a Nijeriya da na wasu ƙasashe 29 a duniya

Jami'ai sun ce gwamnatin Trump ta sauke jakadan Amurka a Nijeriya, Richard Mills a wani bangare na sake fasalin kusan ofisoshin jakadanci 30 da manyan ofisoshin jakadanci a duk duniya.

Wannan matakin wani bangare ne na kokarin daidaita wakilcin diflomasiyyar Amurka a kasashen waje bisa muradin Shugaba Donald Trump na bai wa Amurka fifiko wato "America First".

Jami'an Ma'aikatar Harkokin Waje, wadanda suka yi magana ba tare da an ambaci sunansu ba, sun tabbatar da cewa an naɗa jakadun da wannan sauyi ya shafa ne a lokacin gwamnatin Biden, amma yanzu za su ƙare wa'adinsu a watan Janairu.

Yayin da jami'an diflomasiyyar za su koma Washington don wasu ayyuka idan sun so, za a kammala nadin shugabannin ofisoshin jakadancin.

Mafi yawan jakadun da aka sauke ɗin daga ƙasashen Afirka ne, inda aka sauke jakadu daga ƙasashe 13, da suka haɗa da Nijeriya da Burundi da Kamaru da Côte d'Ivoire, Senegal, da Uganda.

Sauran yankunan da abin ya shafa sun haɗa da Asiya-Pacific, Turai, Gabas ta Tsakiya, Kudancin Asiya, da kuma Yammacin Duniya.

Ma'aikatar Harkokin Waje ta bayyana sauye-sauyen a matsayin "tsari na yau da kullum a kowace gwamnati," in ji mai magana da yawun ma'aikatar, inda ya ce jakadu suna aiki ne bisa ga yardar Shugaban Ƙasa kuma an yi su ne don ciyar da manufofin gwamnati gaba.

"Duk wani jakada wakili ne na Shugaban Ƙasa, kuma haƙƙin shugaban ƙasa ne ya tabbatar da cewa yana da mutane a waɗannan ƙasashe waɗanda ke ciyar da ajandar Amurka gaba-gaba," in ji mai magana da yawun ma'aikatar.

Sauke jakadan Amurka na Nijeriya ya zo ne a daidai lokacin da ake ƙara mai da hankali kan dangantakar Amurka da Afirka kuma ya jawo damuwa daga wasu 'yanmajalisa da kuma kungiyar Ma'aikatan Harkokin Waje ta Amurka, wacce ke wakiltar jami'an diflomasiyyar Amurka.

Ga Nijeriya, ficewar jakadan Amurka ya nuna wani gagarumin sauyi a huldar diflomasiyya a daidai lokacin da kasar ke da muhimmiyar abokiyar hulda a fannin tsaro na yanki, hadin gwiwar tattalin arziki, da kuma shirye-shiryen ci gaba.

Jami'ai sun jaddada cewa jami'an diflomasiyyar da aka kora ba sa rasa ayyukansu a ma'aikatar harkokin waje kuma za su iya ci gaba da aiki a wasu mukamai a cikin Ma'aikatar Harkokin Waje.

Duk da haka, ana sa ran sauyin da ba zato ba tsammani zai buƙaci gyare-gyare a ayyukan ofishin jakadancin da shirye-shiryen diflomasiyya a ƙasashen da abin ya shafa.