Mfululizo wa mashambulizi ya RSF Port Sudan

Kikosi cha Msaada wa Haraka cha Kijeshi cha Sudan (RSF) mapema Jumanne kilifanya mashambulizi ya ndege zisizo na rubani yaliyolenga bandari na uwanja wa ndege katika mji wa Port Sudan, mashariki mwa Sudan.

Moto uliofuatiwa na moshi mkubwa ulionekana katika uwanja wa ndege na bandari ya mji wa Port Sudan, kufuatia sauti ya milipuko mikubwa iliyotokana na shambulio dhahiri la ndege isiyo na rubani, kulingana na mwandishi wa shirika la habari la Anadolu.

Ndege nyingine isiyo na rubani ililenga kambi kuu ya jeshi katikati mwa jiji, afisa wa jeshi aliiambia AFP, na walioshuhudia walisema hoteli iliyo karibu ilipigwa.

Maeneo yote mawili yapo karibu na makazi ya mkuu wa jeshi Abdel Fattah al-Burhan, ambaye amekuwa kwenye vita na makamu wake wa zamani Mohamed Hamdan Daglo, kamanda wa RSF, tangu Aprili 2023.

Ni siku ya tatu mfululizo ambapo msingi wa mamlaka ya serikali inayoungwa mkono na jeshi la Sudan imeanza kushambuliwa. Serikali bado haijasema lolote kuhusu shambulio hilo.

Kufuatia shambulio hilo, safari kadhaa za ndege katika uwanja wa ndege wa Port Sudan zilichelewa au kupangwa upya, kwa mujibu wa chanzo cha ndani ya uwanja huo.

Mashambulio hayo, yanajiri siku moja baada ya ghala kuu la mafuta nchini humo kukumbwa na moto, na kusababisha moto mkubwa kusini mwa mji huo wa mashariki ambao hadi Jumapili ulikuwa ukizingatiwa kuwa kimbilio salama la maelfu ya watu waliokimbia makazi yao kutokana na vita vya miaka miwili.

RSF imezidi kutegemea ndege zisizo na rubani tangu kupoteza maeneo ikiwa ni pamoja na Khartoum mwezi Machi, na kushambulia ndani kabisa ya maeneo yanayoshikiliwa na jeshi.

Siku ya Jumatatu, mkuu wa Umoja wa Mataifa Antonio Guterres alisema ripoti za mashambulizi ya wanamgambo katika Bandari ya Sudan ni “yanatia wasiwasi na kutishia ulinzi wa raia na shughuli za kibinadamu."