Kundi la RSF lawaua wanafamilia wanne katika jimbo la Kordofan Kaskazini nchini Sudan

Raia wanne wa familia moja waliuawa na wanachama wa kikosi cha kijeshi cha RSF katika jimbo la Kordofan Kaskazini nchini Sudan, kundi huru la kutetea haki lilisema Ijumaa.

Kundi la 'Emergency Lawyers' lilisema kuwa lilirekodi tukio la kuwasili kwa askari wa RSF nyumbani kwa familia hiyo huko Al Mazroub siku ya Jumatatu, kwa lengo la kupora mali.

Wanafamilia walipinga jaribio hilo la uporaji kabla ya askari hao kurejea siku iliyofuata na kuua wanafamilia wanne, kulingana na kundi hilo.

Kundi la 'Emergency Lawyers' lililaani mauaji hayo kama "ukiukwaji mkubwa wa haki ya kuishi" na kusema yanaashiria hatari zinazotokana na mashambulizi yanayoendelea dhidi ya raia na mali zao katika mazingira ya kutokuwepo kwa uwajibikaji.

Ulinzi wa raia

Kundi hilo lilitaka kufanyika kwa uchunguzi huru na wa wazi, uwajibikaji kwa wahusika, na hatua za kulinda raia na mali zao.

Mtandao wa Madaktari wa Sudan (Sudan Doctors Network) ulisema mnamo Oktoba 3 kwamba raia 25 waliuawa na askari wa RSF huko Umm Badr, Kordofan Kaskazini.

Hivi karibuni jeshi limepata mafanikio makubwa ya kijeshi katika sehemu kubwa ya Kordofan Kaskazini kufuatia mapigano na kikosi cha RSF.

Jeshi hilo linakaribia kudhibiti sehemu kubwa ya jimbo hilo, huku maeneo machache, yakiwemo Umm Badr na Jabra Al Sheikh, yakisalia chini ya udhibiti wa RSF.

Vita vya uharibifu mkubwa

Majimbo matatu ya Kordofan nchini Sudan – Kaskazini, Magharibi, na Kusini – yameshuhudia mapigano makali kati ya jeshi na kundi la RSF tangu tarehe 25 Oktoba.

Sudan imekumbwa na vita kati ya jeshi na RSF tangu mwaka 2023 kutokana na kutoelewana kuhusu mpango wa kulijumuisha kundi hilo la wanamgambo katika jeshi rasmi la taifa; hali hiyo imesababisha vifo vya makumi ya maelfu ya watu na kuwafanya watu wengine milioni 13 kuyahama makazi yao.