Burundi yafuatilia uamuzi wa Marekani kuwanyima viza

Serikali ya Burundi imesema inachukulia kwa umuhimu uamuzi wa Marekani kuweka sera kali ya viza dhidi ya raia wake.

“Uamuzi wa Marekani wa kusimamisha kwa muda huduma za viza kwa Warundi unachukuliwa kwa uzito,” Albert Shingiro, waziri wa mambo ya nje wa Burundi amesema.

Marekani ilitangaza kusimamisha utoaji wa viza kuanzia 9 Juni 2025 kwa mujibu wa tangazo la Rais.

"Kuzuia Kuingia kwa Raia wa Kigeni kwa ajili ya kulinda Marekani dhidi ya magaidi wa kigeni na vitisho vingine vya usalama wa kitaifa na usalama wa umma." Tangazo hilo lilisema.

Marekani ilisitisha kwa muda utoaji wa viza kwa raia wa Burundi, Cuba, Laos, Sierra Leone, Togo, Turkmenistan, na Venezuela.

“Wizara ya Mambo ya Nje ya Burundi inashiriki kikamilifu katika mazungumzo ya kushughulikia suala hilo. Tunaomba wananchi wote waheshimu sheria za uhamiaji nje ya nchi,” Shingiro ameongezea.

Amesema serikali ya Burundi inajua kuwa kusimamishwa kwa muda hivi karibuni kwa visa ya Marekani kwa Warundi ni changamoto kwa familia nyingi.

“Uamuzi wa hivi majuzi wa Marekani wa kusimamisha huduma za viza kwa kiasi unapaswa kutuhusu sote. Ilisababishwa na baadhi, kwa sababu watu wachache walichagua kutenda kinyume cha sheria au walikataa kurudi nyumbani baada ya muda wa visa zao kumalizika. Hatua hizi, ingawa zimechukuliwa na wachache, zinaweza kufunga milango kwa wengine wengi.” alisema.

Tamaa ya Warundi wengi kutafuta fursa nje ya nchi inaonyesha uhusiano unaokua wa nchi yetu na ulimwengu. Tunawahimiza wasafiri wote kuheshimu sheria na kuheshimu ahadi zao nje ya nchi kwa kuwa hatua zinazowajibika hulinda sifa ya taifa letu na kuweka milango wazi kwa kila mtu.