Uganda kuzima mtandao wa intaneti siku ya uchaguzi: Mamlaka ya mawasiliano

Hatua hiyo ya kufunga mtandao wa intaneti ilitangazwa siku ya Jumanne, siku mbili kabla ya uchaguzi ambao Rais Yoweri Museveni atakuwa mgombea dhidi ya mpinzani wake wa kisiasa, Bobi Wine.

“Hatua hii ni muhimu ili kudhibiti kuenea kwa haraka kwa taarifa potofu, upotoshaji wa habari, udanganyifu wa uchaguzi na hatari zinazohusiana na hayo, pamoja na kuzuia uchochezi wa vurugu unaoweza kuathiri imani ya umma na usalama wa taifa katika kipindi cha uchaguzi,” ilisema Mamlaka ya Mawasiliano ya Uganda (UCC) katika barua ilioandikwa kwa watoa huduma za mtandao, iliyothibitishwa na maafisa wa serikali.

Serikali hapo awali ilikuwa imeahidi kuwa mtandao usingefungwa wakati wa uchaguzi, kupitia ukarasa wake rasmi wa mtandao wa kijamii wa X tarehe 5 Januari kwamba “madai yanayodai vinginevyo si ya kweli, yanapotosha, na yanalenga kusababisha hofu na taharuki zisizo za lazima miongoni mwa wananchi.”

UCC ilisema kuwa kusitishwa kwa huduma kungetekelezwa kuanzia saa 12:00 jioni kwa saa za eneo (15:00 GMT) na kuendelea “hadi tangazo la kurejesha huduma litakapotolewa.”

Iliongeza kuwa huduma muhimu za serikali hazitoathirika na marufuku hiyo.