Tarayyar Afirka ta nuna 'damuwa', Afirka ta Kudu ta nemi a yi taron MDD da gaggawa kan Venezuela

Kungiyar Tarayyar Afirka ta bayyana matuƙar damuwa bayan harin soji na Amurka kan Venezuela da kuma kama Shugaba Nicolás Maduro da gwamnatin Trump ta yi.

"Kungiyar Tarayyar Afirka tana sake tabbatar da dagewarta kan muhimman ƙa'idodin doka na ƙasa da ƙasa, ciki har da girmama ikon ƙasashe, tsaron iyakokinsu, da hakkin al'ummomi na yanke hukunci a kansu, kamar yadda aka shimfida a Yarjejeniyar Majalisar Dinkin Duniya," in ji ƙungiyar ta Afirka a cikin wata sanarwa a ranar Asabar.

Wani jirgin sama da ke ɗauke da Shugaba Maduro ya sauka a New York bayan wani aikin soji na cikin dare na Amurka a Caracas. An fitar da Maduro da matarsa, Cilia Flores, daga jirgin lokacin da suka isa New York, inda aka tuhume su da laifukan miyagun ƙwayoyi da na ta'addanci, waɗanda suka dade suna musantawa.

Bidiyo da wasu kafafen watsa labarai na Amurka suka nuna sun nuna Maduro zagaye da jami'an tsaro yayin da ake yi masa rakiya daga jirgin a Sansanin Jiragen Sama da soji na Stewart.

'Kiyaye kada abin ya ƙara ta'azzara'

Harin Amurka kan ƙasar mai arzikin mai ya janyo fushin duniya kuma ya sa shakku game da tsarin duniya na yanzu.

Kungiyar ta Tarayyar Afirka ta ce 'ta jaddada muhimmancin tattaunawa, sulhu na lumana wajen warware rikice-rikice, da girmama tsarin mulki da na hukumomi, cikin ruhin kyakkyawar maƙwabtaka, haɗin kai, da zaman lafiya tsakanin ƙasashe.'

Kungiyar ta ƙara jaddada cewa za a iya magance matsalolin cikin gida masu rikitarwa da Venezuela ke fuskanta ta hanya mai ɗore ne kawai ta hanyar 'tattaunawa ta siyasa mai faɗi tsakanin 'yan Venezuela da kansu.'

Ta bayyana goyon baya ga mutanen Venezuela kuma ta yi kira ga 'dukkan bangarorin da abin ya shafa su nuna natsuwa, ɗaukar nauyi, da girmama dokokin ƙasa da ƙasa domin hana ƙara ta'azzarar lamarin da kuma kiyaye zaman lafiya da kwanciyar yankin.'

Haka kuma, Afirka ta Kudu a ranar Asabar ta yi kira ga Kwamitin Tsaro na Majalisar Dinkin Duniya da ya yi taro na gaggawa don duba harin sojin Amurka kan Venezuela da kuma kama Shugaba Nicolás Maduro da matarsa.

'Mamayar ƙasashe masu cin gashin kansu'

'Amfani da ƙarfin ba bisa doka ba, na kashin irin wannan yana raunana zaman lafiyar tsarin duniya da kuma ƙa'idar daidaito tsakanin ƙasashe,' in ji Ma'aikatar Harkokin Waje ta Afirka ta Kudu a cikin wata sanarwa a ranar Asabar.

Pretoria ta ƙara da cewa tana lura da matuƙar damuwa game da abubuwan da suka faru a Venezuela kwanan nan kuma tana kallon matakan Amurka a matsayin saɓa Yarjejeniya Kafa Majalisar Dinkin Duniya, wanda ke wajabta wa dukkan ƙasashe membobi su guji barazana ko amfani da ƙarfin da zai shafi tsaron iyakoki ko 'yancin siyasa na kowace ƙasa.

Ta ce kundin bai ba da izinin shiga da sojoji daga waje a cikin al'amuran wata ƙasa ba kan batutuwan da suke hurumin cikin gida na wata ƙasa mai cin gashin kanta ba.

'Tarihi ya nuna cewa mamayewar soja kan ƙasashe masu cin gashin kansu ba ya haifar da komai illa rashin tabbas da zurfafa rikici,' in ji sanarwar.