Rwanda inasema inafanya mazungumzo na Marekani ili ipokee wahamiaji

Rwanda iko katika hatua za awali za mazungumzo ya kupokea wahamiaji waliofukuzwa kutoka Marekani, Waziri wa Mambo ya Nje wa Rwanda Olivier Nduhungirehe alisema kwenye televisheni ya taifa siku ya Jumapili.

"Tuko kwenye majadiliano na Marekani," Nduhungirehe alisema katika mahojiano na Shirika la Utangazaji la Serikali la Rwanda TV.

Rwanda katika miaka ya hivi karibuni imejiweka katika nafasi ya nchi ya kupokea wahamiaji ambayo nchi za Magharibi zingependa kuwaondoa, licha ya wasiwasi wa makundi ya kutetea haki za binadamu kwamba Kigali haiheshimu baadhi ya haki za kimsingi za binadamu.

"Bado haijafikia hatua ambayo tunaweza kusema kwa kina hasa jinsi mipango itakavyoendelea, lakini mazungumzo yanaendelea...bado katika hatua za awali," aliongezea.

Rais Trump alianzisha msako mkali dhidi ya wahamiaji na kujaribu kusimamisha mpango wa kuwapatia wakimbizi wa Marekani makazi mapya baada ya kuanza kwa muhula wake wa pili mwezi Januari.

Kigali ilitia saini makubaliano na Uingereza mwaka 2022 kuchukua maelfu ya waomba hifadhi kutoka Uingereza kabla ya mkataba huo kufutiliwa mbali mwaka jana na Waziri Mkuu mteule wa wakati huo Keir Starmer.

Shirika la Umoja wa Mataifa la kuhudumia wakimbizi (UNHCR) lilionya kuwa kuna hatari baadhi ya wahamiaji waliotumwa Rwanda wanaweza kurejeshwa katika nchi walizokimbia. Kigali ilikanusha madai hayo na kuishutumu UNHCR kwa kusema uwongo.