Mkuu wa Tume ya AU apongeza utambuzi wa Ufaransa wa taif ala Palestina

Mwenyekiti wa Tume ya Umoja wa Afrika (AUC) amepongeza tangazo la Rais wa Ufaransa Emmanuel Macron kwamba nchi yake itatambua taifa la Palestina.

Mahmoud Youssouf alisema uamuzi huo unalingana na "msimamo wa muda mrefu wa Umoja wa Afrika" kuhusu haki za watu wa Palestina - ikiwemo haki yao ya kujiamulia na kuwa na taifa lao.

"Mwenyekiti anaona hatua hii kama hatua muhimu kuelekea suluhisho la haki, la kudumu, na la kina kwa mzozo wa Israeli na Palestina," ilisema taarifa iliyotolewa Jumamosi na msemaji wake.

Mwenyekiti wa AUC alisisitiza tena "msaada thabiti wa Umoja wa Afrika kwa suluhisho la mataifa mawili, ambapo Israeli na Palestina wataishi kwa amani na usalama kando kwa kando."

Tangazo la Macron

Alhamisi, Macron alitangaza nia yake ya kutambua Palestina wakati wa mkutano wa kila mwaka wa viongozi wa dunia huko New York.

Ufaransa itakuwa mwanachama wa kwanza wa G7 - kundi la mataifa makubwa yenye uchumi wa juu zaidi duniani - kutambua taifa la Palestina. Hivi sasa, nchi 147 kati ya wanachama 193 wa Umoja wa Mataifa wanatambua rasmi Taifa la Palestina.

Hatua hii pia inakuja wakati wa mashambulizi ya Israeli dhidi ya Gaza tangu Oktoba 7, 2023, ambayo yameua zaidi ya Wapalestina 59,700, wengi wao wakiwa wanawake na watoto.