Mjumbe wa UN anasema usalama bado ni tete Tripoli, magharibi mwa Libya

Mjumbe maalum wa Umoja wa Mataifa wa Libya alisema siku ya Ijumaa kuwa hali ya usalama mjini Tripoli imeimarika tu kwa sehemu fulani, na kuonya kuwa hali tete inaendelea katika mji mkuu na maeneo ya magharibi.

“Kufuatia makubaliano ya utaratibu mwingine wa usalama mjini Tripoli, hali ya usalama katika mji mkuu imeimarika kwa kiasi fulani,” Hanna Tetteh aliliambia Baraza la Usalama la Umoja wa Mataifa. “Makubaliano yanaendelea kuheshimiwa; hata hivyo, hali mjini Tripoli na magharibi mwa Libya bado ni tete, huku kukiwa na mapigano ya makundi yenye silaha katika maeneo ya kusini mwa Tripoli na maeneo mengine,” alisema.

“Natoa wito kwa wadau wote kufanya kazi kwa pamoja kwa lengo la kutekeleza utaratibu wa usalama uliokubaliwa na kukamilisha mabadiliko ya msingi ili kupata uthabiti,” alisema.

“Tumeridhishwa na mchakato wa tathmini wa Libya uliofanyika katika Baraza la Haki za Binadamu Novemba 11 na tuko tayari kufanya kazi kwa karibu na mamlaka za Libya na wadau kutokana na mapendekezo yaliyofanywa,” aliongeza.

Pamoja na hayo, aliongeza kuwa Umoja wa Mataifa bado “una wasiwasi kuhusu ukiukwaji wa haki za binadamu, ikiwemo dhulma dhidi ya wanawake, wahamiaji, na walio wachache, na vifo kwa walio chini ya ulinzi.”

Huku wakisubiri kusherehekea sikukuu ya Uhuru Disemba 24, alitoa wito kwa viongozi wa Libya “kuwapa watu wa Libya wanachokitaka na kumaliza tofauti zao kwa maslahi ya umoja na maadili ya taifa la Libya.”