Mama na watoto wake wawili wafariki dunia baada ya kiboko kuzamisha mashua katika ziwa Tumba DRC

Mama mmoja na watoto wake wawili walifariki dunia baada ya kiboko kuzamisha boti walilokuwa wakisafiria kaskazini-magharibi mwa Jamhuri ya Kidemokrasia ya Congo; taarifa hii ilitolewa na shirika lisilo la kiserikali la kutetea haki za binadamu siku ya Ijumaa.

Tukio hilo lilitokea usiku wa Alhamisi katika eneo la Bikoro, Mkoa wa Equateur, kulingana na Christophe Yoka, ambaye ni mratibu wa shirika la 'Framework for Development and Well-being'.

Yoka aliwaambia waandishi wa habari mjini Bikoro kuwa wahanga hao walikuwa wakisafiri katika Ziwa Tumba usiku wakati kiboko alipoibuka na kugonga kwa nguvu mtumbwi waliokuwa wakitumia.

Alisema kulikuwa na watu wanne wa familia moja ndani ya mtumbwi huo na ni mtu mmoja pekee aliyenusurika.

Mgogoro kati ya binadamu na wanyamapori

Inaripotiwa kuwa mwili wa mwanamke huyo ulikuwa na majeraha makubwa yaliyosababishwa na shambulio la mnyama huyo.

Uwepo wa viboko ziwani humo ni hatari halisi kwa wakazi wanaotumia mitumbwi ya mbao kila siku kwa usafiri na kusafirisha bidhaa zao, alisema Yoka, akiongeza kuwa tukio hilo ni sehemu ya mfululizo wa matukio ya kukutana kwa jamii na wanyamapori.