Mali yapiga marufuku shirika la Televisheni la Ufaransa TV5 Monde kwa taarifa za maandamano

Mamlaka ya kuratibu vyombo vya habari nchini Mali inasema kuwa inapiga marufuku kituo cha televisheni cha Ufaransa katika nchi hiyo kutokana “na taarifa za uchochezi” ambazo iliandaa wakati wa maandamano katika mji mkuu mapema mwezi huu.

Mamlaka ya mawasiliano zinasema katika barua iliyosambazwa siku ya Jumanne kuwa itafunga mitambo ya kituo cha Ufaransa cha TV5 Monde baada ya mtangazaji wake kusema kuwa “mamia ya maafisa wa usalama walikuwepo kuzuia waandamanaji kufika” katika ukumbi mmoja wakati wa maandamano ya 3 Mei.

Mamlaka zinasema kuwa taarifa hizo si sahihi "maafisa wa usalama walikuwepo kwenye ukumbi huo kuhakikisha waandamanaji wako salama.”

TV5 Monde haikusema lolote kuhusu tangazo hilo.

Mitambo kufungwa

Uamuzi huu wa Mamlaka za Mali umekuwa wa hivi karibuni ukilenga vyombo vya habari. Mitambo ya shirika la France 24 na Radio France Internationale (RFI) ilifungwa kwa miaka mitatu sasa.

Kituo cha Televisheni binafsi cha Mali, Djoliba TV News, kiliondolewa hewani kwa miezi sita tangu Disemba iliopita kufuatia mjadala uliohoji taarifa rasmi za kutibua jaribio la mapinduzi katika nchi jirani ya Burkina Faso.

Kama ilivyo kwa Burkina Faso na Niger, Mali pia inaongozwa na utawala wa kijeshi ambao ulichukua uongozi wa nchi kupitia mapinduzi. Mataifa hayo yameunda muungano unaojulikana kama muungano wa Mataifa ya Sahel.