Kiongozi anayetaka kujitenga kwa Biafra Nigeria ashtakiwa Ufini kwa kuchochea ugaidi

Waendesha mashtaka nchini Ufini siku ya Ijumaa wanasema wamemshtaki mtu mmoja kwa kuchochea ugaidi kwa njia ya mtandao ambaye ametambuliwa na chombo cha habari kama kiongozi anayetaka kujitenga kwa Nigeria Simon Ekpa.

Ofisi ya mwendesha mashtaka ya Ufini inasema katika taarifa kuwa imemshtaki "raia mmoja wa Ufini katika kesi ya kuchochea umma kufanya uhalifu na kushiriki katika vitendo vya kundi la kigaidi."

Iliongeza kuwa madai ya uhalifu huo ulifanyika katika mji wa Lahti kati ya 2021 na 2024 na ulikuwa unahusiana na juhudi za mshukiwa kutaka kuanzisha eneo la Biafra nchini Nigeria kama taifa huru.

Upande wa mashtaka haukumtaja mshtakiwa lakini shirika la habari la umma la Ufini YLE lilimtaja kuwa kiongozi anayetaka kujitenga Simon Ekpa.

Kukanusha mashtaka

Ekpa - ambaye anadai kuongoza serikali ya Jamhuri ya Biafra akiwa uhamishoni - alikamatwa mwezi Novemba.

Kulingana na waendesha mashtaka, mshukiwa alikuwa kizuizini na amekanusha madai hayo.

Ekpa anajulikana kwa kujitangaza kuwa kiongozi wa kundi linalotaka kujitenga la wazawa wa Biafra (IPOB), ambalo linataka kuwa taifa huru kusini mashariki mwa Nigeria, ambapo kulizuka mapigano ya kikatili ya wenyewe kwa wenyewe katika miaka ya mwishoni mwa miaka sitini.

Ekpa mwenye uraia pacha wa Ufini na Nigeria pia amekuwa mwakilishi wa serikali za mitaa katika mji wa Lahti, kaskazini mwa mji wa Helsinki, akiwa na muungano wa kihafidhina, ambapo pia amehudumu katika kamati ya usafiri wa umma.

Kuondolewa mashtaka

Wakati Ekpa alipokamatwa, mamlaka nchini Ufini pia ziliwakamata watu wengine wanne kwa madai ya kumfadhili Ekpa.

Siku ya Ijumaa, mwendesha mashtaka alisema kuwa wameamua kuondoa mashtaka dhidi ya wanne hao katika kesi hiyo kutokana na kutokuwepo kwa ushahidi.

Shirika la habari la AFP limekuwa likimuangazia Ekpa katika miaka ya hivi karibuni kufuatia madai ya uwongo na taarifa za kupotosha alizokuwa akitoa kuhusu kutaka kujitenga.