Kano: Jami'an tsaron Nijeriya sun ceto mutum bakwai da 'yan bindiga suka sace a Tsanyawa

Dakarun Operation MESA, waɗanda suka haɗa da jami’an Runduna ta 3 ta sojojin ƙasa da na sama da ‘yan sandan Nijeriya, sun ceto mutane bakwai da aka yi garkuwa da su a wani samamen da dakarun suka kai da dare a ƙauyen Yankamaye Cikin Gari da ke Karamar Hukumar Tsanyawa ta Jihar Kano.

Jami’an sun kai samamen ne bayan samun kiran gaggawa daga mutanen yankin kan ayyukan ’yan bindiga a wajen.

A cewar wata sanarwa da Kanal Babatunde Zubairu, Mataimakin Daraktan Hulɗa da Jama’a na Rundunar Sojan Ƙasa ta Nijeriya ya fitar, ’yan bindigar sun riga sun kashe wata mata ’yar shekaru 60 kafin isowar dakarun.

Bayan samun kiran gaggawan, ‘yan bindigar sun yi amfani da hanyar Rimaye wurin janyewa wanda hakan ya sa sojojin suka bi sawun, suka yi artabu inda suka rinƙa yi musu luguden wuta.

Sojojin sun yi gaggawar ceto waɗanda aka yi garkuwa da su. Sai dai har yanzu mutane huɗu daga cikin waɗanda aka sace ba a gano su ba.

’Yan bindigar sun tsere zuwa hanyar Karamar Hukumar Kankia a Jihar Katsina, kuma ana ci gaba da ƙoƙarin bibiyar inda suke, in ji sanarwar.

Kwamandan Runduna ta 3 ya yaba wa dakarun bisa jarumta da gaggawar da suka yi wurin mayar da martani.
Ya kuma yi kira ga jama’a da su ci gaba da ba hukumomin tsaro haɗin kai ta hanyar samar da ingantattun bayanai cikin lokaci domin taimaka wa ci gaban ayyukan da ake gudanarwa.