Dubban mutane sun halarci jana’izar Sheikh Dahiru Bauchi a Nijeriya

An yi jana’izar babban malamin addinin Musuluncin nan na Nijeriya, Sheikh Ɗahiru Usman a Babban Masallacin Idi da ke Bauchi, inda daga bisani aka binne shi a Masallacin Jumma'ar da Shehin ya gina da ke kusa da gidansa.

Babban malamin Musulunci a ƙasar Sheikh Shariff Ibrahim Saleh ne ya jagoranci jana’izar Sheilk Dahiru, a bisa wasiyyar da iyalansa suka ce ya daɗe da bari.

Birnin Bauchi ya cika maƙil da al’umma daga ɓangarori daban-daban da suka je don halartar jana’iazar Shehin Malamin, kamar yadda rahotanni da dama suka bayyana.

Gwamnatin Tarayyar Nijeriya ta aika babbar tawagar da ta haɗa da Mataimakin Shugaban Ƙasar Kashim Shettima,da Mai baiwa Shugaban Ƙasa Shawara kan Tsaro Malam Nuhu Ribadu.

Shi ma tsohon Mataimakin Shugaban Nijeriya, Alhaji Atiku Abubakar ma ya samu halartar jana’izar.

Sauran ƴan tawagar gwamnatin tarayya sun haɗa da Sanata Abdulaziz Yari, Sanata Shehu Buba Umar, Ministan Noma, Abubakar Kyari, Ministan Harkokin Waje AmbasadaYusuf Maitama Tuggar, Ministan Lafiya Farfesa Muhammad Ali Pate, Ministan Yaɗa Labarai Mohammed Idris da kuma Ministan Cigaban Yanki Uba Maigari Ahmadu.

Akwai kuma ƙarin manyan jami’an gwamnati irin su Mai Bai wa Shugaban Ƙasa Shawara kan Ayyuka na Musamman, Dr Aliyu Modibbo Umar da Mai Bai wa Shugaban Kasa Shawara na Musamman kan Yada Labarai Abdulaziz Abdulaziz da tsohon shugaban hukumar alhazai ta Nijeriya Barista Abdullahi Mukhtar.

Akwai kuma gwamnoni da suka halarci jana’izar kamar Abba Kabir Yusuf na Jihar Kano da Umar Bago na Jihar Neja

Sannan akwai manyan malamai da suka je Bauchin don bankwanan ƙarshe da gawar marigayin, kamar irin su Limamin Babban Masallacin Ƙasa na Abuja, Sheikh Maƙari, wanda shi ne ma ya gabatar da huɗubar Sallar Jumma’a a masallacin marigayin, da kuam Shikh Aminu Daurawa.

Kazalika almajiran malamin daga ko ina a fadin Nijeriya sun samu halartar jana’izar, wadda Gwamnatin Jihar Bauchi ta ayyana hutu na musamman a ranar Jumma'a domin alhinin rasuwar marigayi Sheikh Ɗahiru Usman Bauchi wanda ya rasu a ranar Alhamis.

A cikin wata sanarwa da mai bai wa gwamnan shawara kan yaɗa labarai Mukhtar Gidado ya fitar, an sanar da hutun ne domin bayar da dama ga ma'aikata da ɗalibai da ma ƴan jihar bakiɗaya su samu damar halartar jana'izar marigayin.

Tun da fari a ranar Alhamis bayan sanar da rasuwarsa, mutane da dama sun yi ta bayyana saƙon ta’aziyya, ciki har da malaman ɓangaren izala, kamar shugaban Jibwis, Sheikh Abdullahi Bala Lau, da Sakataren Jibwis, Sheikh Kabiru Haruna Gombe.

Sauran malamai irin su Sheik Isa Ali Pantami da Ibrahim Jalo Jalingo ma duk sun yi ta’aziyyar rasuwar malamin a shafukansu na soshiyal midiya.