Erdogan: Ƙawancen Turkiyya da Amurka wani mabuɗi ne na samun zaman lafiyar yanki da duniya

Shugaban ƙasar Turkiyya, Recep Tayyip Erdogan, ya jaddada irin ƙoƙarin da Turkiyya ke yi na samar da zaman lafiya da kwanciyar hankali a cikin yanayin duniya mai saurin sauyawa — inda ya mayar da hankali musamman kan dangantakar da ke tsakanin Ankara da Washington.

“Dangantakar Turkiyya da Amurka tana da matuƙar muhimmanci wajen samar da kwanciyar hankali a yankinmu da duniya baki ɗaya. Muna ƙoƙarin samar da wata turba ta tattaunawa mai amfani da mayar da za ta ba da sakamako mai kyau,” in ji Erdogan yayin da yake hanyarsa ta komawa Turkiyya bayan ziyarar aikin da ya kai Albania a ranar Juma’a.

Ya yi kira da a sake mayar da hankali kan ƙimar haɗin kai da daidaito musamman a cikin tsarin NATO.

Haɗin kai kan tsaro

Erdogan ya kuma taɓo batun tsawon lokaci na rashin jituwa da ke da alaƙa da haɗin kai kan tsaro da takunkumi, yana cewa: “Game da CAATSA, za mu iya cewa akwai sassaucin matsayi. Ina da tabbacin cewa za mu shawo kan tsarin CAATSA cikin sauri sosai.”

Shugaban ƙasar Turkiyya ya dage cewa bai kamata a samu wani cikas a fannin haɗin kai kan tsaro tsakanin ƙasashen biyu ba.

“A matsayinmu na manyan abokan hulɗa kuma mambobin NATO, bai kamata a samu wani takunkumi ko cikas a tsakaninmu a fannin tsaro ba,” in ji shi.

Erdogan ya sake jaddada abin da Ankara ke jira na ganin an cire duk wani shinge da ke cutar da ƙawancen. “Cire duk wani shinge da ya saba wa ruhin haɗin kai na dabaru shi ne babban burinmu. Kowanne mataki mai kyau yana da daraja. Ina da tabbacin cewa za a samu ƙarin ci gaba,” in ji shi.