Dubban ‘yan kasar Libya sun taru don halartar jana'izar Saif al-Islam Gaddafi

Dubban mutane sun taru a ranar Jumma'a a arewa maso yammacin Libya domin jana'izar Saif al-Islam Gaddafi, ɗa kuma magajin marigayi shugaban Libya Muammar Gaddafi, wanda aka kashe a farkon wannan makon lokacin da wasu mahara guda huɗu suka kutsa kai cikin gidansa suka harbe shi da bindiga.

Masu makoki sun ɗauki akwatin gawarsa a garin Bani Walid, mai nisan kilomita 146 (mil 91) kudu maso gabashin babban birnin Tripoli, da kuma manyan hotunan Saif al-Islam, wanda aka fi sani da sunansa na farko, da kuma mahaifinsa.

Muammar Gaddafi ya mulki ƙasar fiye da shekaru 40 kafin a hambarar da shi a shekarar 2011. An kashe shi daga baya a wannan shekarar a garinsu na Sirte yayin da rikicin Libya ya rikide zuwa yaƙin basasa.

Yayin da aka fara jana'izar kuma taron jama'a ya ƙaru, ƙaramin rukuni na magoya baya ya ɗauki akwatin gawar Saif al-Islam daga baya aka yi sallar jana'izar da kuma binne shi.

An kashe shi ta hanyar harbi

An kashe Saif al-Islam, mai shekaru 53, a ranar Talata a cikin gidansa da ke garin Zintan, mai nisan kilomita 136 (mil 85) kudu maso yammacin babban birnin Tripoli, a cewar babban mai gabatar da kara na Libya.

Hukumomin sun ce wani bincike na farko ya gano cewa an harbe shi har lahira amma ba su bayar da ƙarin bayani ba.

Daga baya ƙungiyar siyasa ta Saif al-Islam ta fitar da wata sanarwa da ke cewa "mutane huɗu sanye da abin rufe fuska" sun afka gidansa tare da kashe shi a cikin "kisan gilla mai ban tsoro da yaudara," bayan sun kashe kyamarorin tsaro da ke gidan.

"Abin baƙin cikin da ya faru ya dame ni ƙwarai, kuma yana ƙaruwa saboda ba zan iya yi masa bankwana daga cikin ƙasarmu ba - ina jin wata azaba da kalmomi ba za su iya bayyanawa ba," in ji ɗan'uwan Saif al-Islam Mohamed Gaddafi, wanda ke zaune a matsayin dan gudun hijira a wajen Libya duk da cewa ba a san inda yake a yanzu ba, ya bayyana a Facebook ranar Juma'a.

"Amma ta'aziyyata ta ta'allaka ne ga cewa 'yan ƙasa masu aminci suna cika aikinsu kuma za su yi masa bankwanan da ya dace da matsayinsa," in ji ɗan'uwan.