Jami’an Amurka sun bayyana hare-haren a matsayin matakan kariya, inda suka ce an kai su ne domin hana Iran samun damar kai hari kan jiragen kasuwanci da ke bi ta mashigar ruwan Hormuz.
Amurka ta kai hare-hare kan tsibirin Qeshm na Iran, kamar yadda jaridar The Wall Street Journal ta ruwaito, tana mai ambaton wasu jami’an gwamnatin Amurka.
Rahotannin sun ce an kai hare-haren ne a ranar Litinin, a daidai lokacin da Shugaban Amurka Donald Trump ke ƙoƙarin rage fargabar yiwuwar sake barkewar babban rikicin soji tsakanin Amurka da Iran a yayin da ake shirin gudanar da zaɓen tsakiyar wa’adin majalisar dokokin Amurka a ranar Talata.
“Wannan matakin kariya kan Iran wadda ta yi amfani da makamai masu linzami masu wajen kai hare-haren sama kan kadarorin Amurka,” kamar yadda wani jami’in Amurka ya bayyana.
Trump ya shaida wa manema labarai cewa, “Mun yi yaƙi da Iran. Mun yi nasara.” kamar yadda Trump ya shaida wa manema labarai da safiyar ranar, yana mai ƙari da cewa, “Ban ma san ko za a iya kiran abin da ya faru da yaƙi ba, domin ba mu fafata ba tsawon watanni.”
Sai dai wasu jami’an Amurka sun shaida wa jaridar The Wall Street Journal cewa, sojojin Amurka sun ci gaba da kai ƙananan hare-hare kan wuraren Iran tsawon makonni.
A cewar rahoton, wasu jami’an Amurka sun bayyana hare-haren a matsayin matakan kariya da aka ɗauka domin hana Iran samun ƙarfin da zai ba ta damar yin barazana ko kai hari kan jiragen kasuwanci da ke wucewa ta mashigar ruwan Hormuz, wadda ke da matuƙar muhimmanci ga harkokin sufuri da cinikayyar duniya.
An ji a karar fashe-fashe da sanyin safiyar ranar Talata a kudancin ƙasar, ciki har da tsibirin Qeshm da birnin Bandar Lengeh da ke gabar teku, a cewar rahotannin da Kamfanonin dillancin labaran Iran suka ruwaito.
Trump ya rage fargabar sake barkewar yaƙi
A ranar Litinin, Trump ya yi watsi da yiwuwar sake kai hare-haren soja kan Iran bayan zaɓen tsakiyar wa’adin majalisar dokoki ta Amurka, yana mai cewa ƙoƙarin diflomasiyya na samun ci gaba.
A yayin tambayar da wani ɗan jarida ya yi wa shugaban na Amurka kan ko yana shirin sake kai hari kan Iran bayan zaɓen, Trump ya amsa da cewa, “A’a.”
Trump ya jaddada ewa Iran ba za ta taɓa mallakar makaman nukiliya ba, yana mai cewa jami’an Iran sun riga sun fahimci matsayar Amurka kan wannan batu.
Ya ce, hana Tehran mallakar ƙarfin nukiliya na da muhimmanci matuƙa, yana mai gargaɗin cewa ƙasar ba za ta iya ci gaba da tafiyar da al’amuranta kamar yadda take yi a yanzu ba idan ta samu irin wannan ƙarfin.
“Mun dakatar da hakan a shekarar da ta wuce ta hanyar amfani da manyan jiragen yaƙinmu samfurin B-2, waɗanda suka kai hari kan dukkan wuraren kuma suka binne komai a ƙarƙashin ɗaruruwan tan na duwatsu,” in ji Trump.
Shugaban Amurkan ya kuma nuna cewa tattaunawar diflomasiyya na tafiya yadda ya kamata, yana mai danganta yiwuwar cim ma yarjejeniya da raguwar farashin makamashi.
“Wataƙila hakan ne ya sa farashin mai ya faɗi sosai” in ji shi.
TRT Afrika — TRT Afrika
INEC ta wallafa sunan Pantami a shafinta na ’yantakarar gwamna amma babu Gwarzo na Kano
A cikin jerin sunayen ’yan takarar da aka wallafa, an ga rubutun “Court Order” a gaban sunan jam’iyyar NDC, ba tare da bayyana sunan ɗan takararta ba.
Khamenei ya umarci sojojin Iran su mayar da martani nan take idan Amurka ko Isra'ila suka kai hari
A cikin wata sanarwa da aka wallafa a shafinsa na intanet, Khamenei ya ce: “Duk wani mataki ko nau'in barazana dole ne a fuskance shi da martani nan take, mai tasiri, kuma ba tare da takaita shi ga wani yanki na ƙasa ba.”
Ayarin motocin sojin Aljeriya ya isa birnin Arlit na Nijar
A makon da ya gabata ne Majalisar Ƙasa ta Aljeriya ta amince da tura wani ɓangare na sojojin ƙasar zuwa Nijar don tabbatar da tsaron ayyukan man fetur na kamfanin Sonatrach na Aljeriya da ke aiki a Nijar ɗin.
An kiyaye duk haƙƙoƙi. Newstimetr © 2026
