Watu 6 wameuawa Syria kufuatia shambulio la msikitini wakati wa swala ya Ijumaa

Takriban watu sita wameuawa na wengine 21 kujeruhiwa baada ya mlipuko kutokea katika msikiti mmoja ulioko mji wa Homs, katikati mwa Syria, wakati wa swala ya Ijumaa, kwa mujibu wa Wizara ya Mambo ya Ndani ya Syria.

Taarifa ya wizara hiyo ilisema kuwa “mlipuko wa kigaidi” uliulenga Msikiti wa Imam Ali ibn Abi Talib uliopo Mtaa wa Al-Khodari katika eneo la Wadi al-Dhahab.

Shirika la habari la SANA liliripoti kuwa uchunguzi unaendelea kubaini “hali halisi ya shambulio hilo.”

Hadi sasa hakuna kundi lililodai kuhusika na shambulio hilo.

Katika tukio lingine, ghala la silaha katika mkoa wa Idlib kaskazini-magharibi mwa Syria pia lilikumbwa na mlipuko siku ya Jumatano, na kusababisha vifo vya watu watano na kujeruhi wengine tisa, kulingana na vikosi vya usalama.

Vikosi vya usalama vya Idlib vilisema kuwa mlipuko wa Jumatano katika mji wa Kafr Takharim ulisababishwa na ghala lililokuwa na makombora na risasi, na ulitokea wakati kazi zilipokuwa zinaendelea karibu na eneo hilo. Waliongeza kuwa wafanyakazi watano wa eneo hilo walifariki dunia.