Aikin jigilar maniyyatan Nijar zuwa Saudiyya domin gudanar da Umrah a watan Ramadan ya fuskanci cikas bayan rufe filin jirgin saman Dubai sakamakon hare-haren jirage marasa matuƙa da Iran ta kai a Hadaddiyar Daular Larabawa (UAE).
Rahotanni sun ce mafi yawan jiragen maniyyatan Nijar na bi ta Dubai kafin su wuce Saudiyya, lamarin da ya dagula shirye-shiryen kamfanonin sufuri da Hukumar Shirya Aikin Hajji da Umrah ta Nijar (COHO).
Shugaban sashin sadarwa na COHO, Guibrima Ali Boukar, ya ce rufe filin jirgin ne ya sa aka soke tafiyar maniyyatan da aka tsara su bi ta Dubai, yayin da wasu da suka riga suka isa Saudiyya za su iya fuskantar matsala a dawowarsu.
Ya ce kamfanonin sufuri suna ƙoƙarin samo jirage na musamman domin kai wasu maniyyata kai tsaye daga Niamey zuwa Madina domin rage tasirin matsalar.
Wani jami’in kamfanin jigilar Bab Al Sabour, Elhadj Karimou Moustapha, ya ce kafin barkewar rikicin sun riga sun kai fiye da maniyyata 500 daga Nijar zuwa ƙasa mai tsarki domin gudanar da Umrah.
Sai dai wasu daga cikin maniyyatan sun fasa tafiya saboda fargabar rikicin da ke faruwa a yankin Gabas ta Tsakiya.
Rahotanni sun nuna cewa filin jirgin saman Dubai ya dakatar da ayyukansa na ɗan lokaci bayan wasu makamai masu linzami da jirage marasa matuƙa da Iran ta harba domin kai hari kan sansanonin sojin Amurka da ke UAE.
Sai dai jami’an diflomasiyyar Nijar a Jeddah sun tabbatar da cewa hare-haren ba su shafi wuraren ibada a Saudiyya ba, kuma maniyyata na gudanar da ibadarsu cikin kwanciyar hankali.
Hukumar COHO ta ce idan filin jirgin Dubai bai buɗe ba kafin ƙarshen Ramadan, za su nemi wasu hanyoyin sufuri ta kamfanonin jiragen sama da ba sa bi ta can domin kai maniyyata Saudiyya.
Tushen labari: Newstimehub
Comment