Sabbin bayanan kuɗi da aka wallafa a Amurka sun nuna cewa shugaban ƙasar, Donald Trump, ya sayi takardun lamuni na kamfanoni da ƙananan hukumomi da darajarsu ta kai aƙalla dala miliyan 82 tsakanin ƙarshen watan Agusta da farkon Oktoba.
A cewar bayanan da Ofishin Kula da Ɗa’ar Ma’aikata na Gwamnatin Amurka ya fitar a ranar Asabar, Trump ya gudanar da fiye da sayayya 175 daga ranar 28 ga Agusta zuwa 2 ga Oktoba. An bayyana bayanan ne ƙarƙashin dokar bayyana kadarori ta shekarar 1978 mai suna Ethics in Government Act.
Sai dai takardun ba su nuna ainihin adadin da aka kashe kan kowace sayayya ba, domin dokar na ba da damar bayyana ƙididdigar kuɗin kawai. Jimillar darajar takardun lamunin da aka saya na iya zarce dala miliyan 337, a cewar bayanan.
Yawancin takardun lamunin da aka lissafa sun fito ne daga hukumomin ƙananan garuruwa, jihohi, gundumomi da sassan makarantu, da sauran hukumomin gwamnati.
Bayanai sun kuma nuna cewa Trump ya zuba jari a takardun lamuni na kamfanoni da dama daga sassa daban-daban na tattalin arziki. Daga cikin kamfanonin da aka ambata akwai masu kera na’urorin kwamfuta Broadcom da Qualcomm, kamfanin fasaha Meta Platforms, da kamfanonin sayar da kayayyaki irin su Home Depot da CVS Health, da kuma manyan bankunan Wall Street kamar Goldman Sachs da Morgan Stanley.
Rahoton ya kuma nuna cewa Trump ya sayi takardun lamuni daga bankin JP Morgan a ƙarshen watan Agusta. Hakan na zuwa ne yayin da shugaban ya bukaci Ma’aikatar Shari’a ta Amurka ta binciki bankin kan tsohuwar alaƙarsa da attajirin nan Jeffrey Epstein, wanda ake zargi da aikata laifukan lalata. Bankin ya ce yana nadamar alaƙarsa ta baya da Epstein.
Har ila yau, Trump ya sayi takardun lamuni daga kamfanin Intel bayan gwamnatin Amurka ta saka hannun jari a kamfanin a ƙarƙashin manufofinsa.
Fadar White House ba ta yi martani nan take kan rahoton ba. Sai dai gwamnatin ta sha bayyana cewa Trump da iyalansa ba su da hannu kai tsaye a harkokin kasuwancinsa, inda kamfanoni na daban ke kula da su, yayin da ‘ya’yansa ke sa ido a kan harkokin.
A baya bayanan da aka fitar a watan Agusta sun nuna cewa Trump ya sayi takardun lamuni na sama da dala miliyan 100 tun bayan dawowarsa kan kujerar shugabancin Amurka a ranar 20 ga Janairu.
Bayanin kadarorin da ya gabatar a watan Yuni ya nuna cewa har yanzu yana samun kuɗaɗen shiga daga fannoni daban-daban na kasuwancinsa, ciki har da kirifto, filayen golf da lasisi. Rahoton ya nuna cewa kuɗin shigar da ya samu daga waɗannan fannoni ya haura dala miliyan 600.
A cewar ƙididdigar Reuters, jimillar dukiyoyin da Trump ya bayyana sun kai aƙalla dala biliyan 1.6.
Tushen labari: newstimehub
Comment