Trump atishia kumshtaki mtangazaji wa Grammy wa Afrika Kusini, Trevor Noah

Donald Trump alitishia kuchukua hatua za kisheria Jumatatu dhidi ya Mtangazaji wa Tuzo za 68 za Grammy kutokana na maoni ya mchekeshaji huyo kuhusu rais wa Marekani na mhalifu wa kingono Jeffrey Epstein.

Baada ya kumpongeza Billie Eilish kwa kushinda Tuzo ya Grammy ya Wimbo Bora wa Mwaka kwa wimbo wake "Wildflower," Raia huyo wa Afrika Kusini Trevor Noah alianza kuwazungumzia Trump na Epstein.

"Lo. Hiyo ni Grammy ambayo kila msanii anataka - kama vile Trump anataka Greenland," alidakia, akirejelea vitisho vya rais vya kunyakua eneo linalojisimamia la Arctic.

Noah kisha akaongeza: "Ni jambo la maana kwa sababu, tangu Epstein aondoke, anahitaji kisiwa kipya ili kujumuika na Bill Clinton."

Noah, ambaye alitangaza kuwa huu utakuwa mwaka wake wa mwisho kutangazia Grammys baada ya zamu sita kama emcee, amekuwa akijiepusha na maoni ya kisiasa katika miaka iliyopita.

Jibu la Trump

Maoni yake yalimkasirisha rais huyo, ambaye aliingia kwenye jukwaa lake la Truth Social kwanza akisema kwamba "Tuzo za Grammy ndizo MBAYA ZAIDI na haziwezi kutazamwa," kabla ya kumkosoa Noah.

"Siwezi kumzungumzia Bill, lakini sijawahi kufika Kisiwa cha Epstein, wala mahali popote karibu, na hadi taarifa ya uwongo na kashfa ya usiku wa leo, sijawahi kushutumiwa kuwa huko," Trump alisema.

Trump aliongeza kuwa Noah anahitaji "kutafuta taarifa sahihi".

"Nitawatuma mawakili wangu...Jiandae Noah, nitakuonyesha !" Trump aliongeza.

Trump, ambaye alionekana akitangamana na Epstein huko Florida na New York, amepigana kwa miezi kadhaa kuzuia kutolewa kwa hati nyingi kuhusu mfadhili huyo aliyefedheheshwa na ametoa maelezo za kutofautiana za kwanini hatimaye alikosana na Epstein.

Zaidi ya hati milioni tatu zilitolewa Ijumaa ambayo ni pamoja na kutajwa kwa watu wengi mashuhuri , akiwemo rais Trump mwenye umri wa miaka 79, Elon Musk, Bill Gates, Bill Clinton na mwanamfalme wa Uingereza Andrew Mountbatten-Windsor.