Ronaldo zai iya komawa tawagar Portugal idan yana so, in ji kocin ƙasar

Cristiano Ronaldo zai iya komawa tawagar ƙwallon ƙafar Portugal idan yana so, duk da cewa ya ƙaurace wa tawagar, in ji kocin ƙasar Jorge Jesus.

Jesus ya bayyana ranar Lahadi cewa Ronaldo zai iya dawowa cikin tawagar "idan yana so" bayan tawagar ta doke Norway ba tare da ɗanwasan gaban ba kuma ta samu kaiwa matakin kwata-fainal na gasar Nations League.

An fara jayayya tsakanin Ronaldo da kocin ne a makon jiya a lokacin da Jesus ya ajiye ɗanwasan mai shekara 41 a benci a wasan farko da Portugal ta yi nasara a kan Norway.

Daga bisani Ronaldo ya janye daga jerin ‘yanwasan tawagar ranar Laraba bayan ya ji cewa ba za a fara wasan Denmark ba tare da shi ba.

"A gare ni, Cris, idan yana wasa a Al-Nassr, zai kasance ɗanwasan da za a iya gayyata nan gaba," kamar yadda Jesus ya shaida wa manema labarai yayin da yake ishara ga kulob ɗin Ronaldo na Saudiyya. "Idan yana so, zai iya dawowa tawagar ƙasa."

Kocin ya ce idan Ronaldo na so ya yi magana da shi kafin wasannin Portugal na watan Nuwamba, hakan mai yiwuwa ne.

"Idan yana so, kamar yadda muka yi kafin wannan gayyatar, mun tattauna kafin gayyatar, za mu iya tattaunawa kafin wasanni masu zuwa," a cewar Jesus. "Amma Cris ne wanda zai yanke shawara."

Tsohon ɗanwasan gaban Real Madrid da Manchester United Ronaldo shi ne ɗanwasan da ya fi ci wa Portugal ƙwallo a tarihi kuma ɗanwasan da ya fi buga mata wasa.

Jesus ya ce ya shaida wa Ronaldo cewa yana buƙatarsa a wasanninsa na farko a matsayin koci bayan ya maye gurbin Roberto Martinez biyo bayan Gasar Kofin Duniya ta 2026.

"Ya kamata Cristiano ya ƙarƙare lokacinsa a tawagar ƙasa kamar yadda yake so, shi ne zai yanke shawara game da yadda yake son sa," a cewar Jesus.

"Haka muka tattauna, ni da shi - na ce, 'Ina buƙatarka'. A gayyatata ta farko, na ce, 'Ina buƙatarka, ina buƙatarka ka kasance kusa da ni, ko kana wasa ko ba ka wasa, ina buƙatarka'. Kuma a yanzu ina faɗan abin ne."

Shekara ta ƙarshe ta ƙwallon ƙafa?

Ronaldo, wanda ya fara wasansa na farko wa Portugal a shekarar 2003 a lokacin da yake da shekara 18, ya ce wannan zai "iya kasancewa" shekararsa ta ƙarshe a fagen tamaula.

Ɗanwasan ne shi ne ɗanƙwallo da ake yawan gani a tawagar ƙwallon ƙafar ƙasar fiye da shekaru ashirin kuma ya buga Gasar Kofin Duniya sau shida.

Duk da cewa babu Ronaldo a wasan, Portugal ta kasance ƙasa ta farko da ta fara kaiwa matakin kwata-fainal, yayin da take da wasannin rukuni-rukuni biyu da za ta buga.

Daɗaɗɗen abokin gogayyar Ronaldo wajen neman kyautar gwarzon ɗanwasan duniya, Lionel Messi, zai buga wasansa na ƙarshe wa Argentina a wani wasa na sada zumunta da Benin a Buenos ranar Talata.

Sai dai, abokin wasansa a tawagar Bruno Fernandes ya ce Ronaldo zai ci gaba da kasancewa “alama mafi girma” a tawagar ƙwallon ƙafar Portugal da ma ƙasar baki ɗaya, duk da ce-ce-ku-cen da ke kewaye da tafiyarsa.

“Na tattauna da Cris. Abin da na shaida masa shi ne abu mafi muhimmanci, ko ma mene ne ya faru, ba zai daina kasancewa alama mafi girma a tawagar ƙwallon ƙafar ƙasar baƙi ɗaya ba, domin dukkan abubuwan da ya yi a Portugal da ma sassan duniya,” kamar yadda Fernandes ya shaida wa manema labarai gabanin wasan ranar Lahadi na UEFA Nations da Norway.

“Ya samar wa kansa wuri ba wai a cikin gwarzaye na tarihi kawai ba, amma a cikin zukatan ‘yan ƙasar Portugal.”