Qatar imewasilisha rasmi nia kuandaa Olimpiki ya 2036

Jiji la Doha limetangaza rasmi kuwa linawania kuwa mwenyeji wa Michezo ya Olimpiki na Paralimpiki ya mwaka 2036. Viongozi wa serikali walieleza Jumanne kuwa lengo lao ni kuandaa tukio lingine kubwa la michezo kama sehemu ya juhudi za kubadilisha uchumi wa nchi hiyo ya Ghuba ya Uajemi unaotegemea nishati.

Waziri Mkuu na Waziri wa Mambo ya Nje, Sheikh Mohammed bin Abdulrahman Al-Thani, alisisitiza kuwa Qatar ikichaguliwa, itakuwa nchi ya kwanza katika Mashariki ya Kati na Afrika Kaskazini kuwa mwenyeji wa Michezo ya Olimpiki.

Katika taarifa iliyotolewa na shirika rasmi la habari la Qatar, Sheikh Al-Thani alisema: "Ombi rasmi la Kamati ya Olimpiki ya Qatar (QOC) la kuwa mwenyeji wa Michezo ya Olimpiki na Paralimpiki ya 2036 ni mwanzo wa hatua mpya katika njia ya maendeleo ya nchi."

Aidha, aliongeza kuwa "Ombi hili limejengwa juu ya uzoefu wa Qatar katika kuandaa matukio makubwa ya kimataifa ya michezo, hasa Kombe la Dunia la FIFA la mwaka 2022."

Haki za binadamu

Hata hivyo, mashirika kadhaa ya kutetea haki za binadamu yameeleza wasiwasi wao kuhusu vifo vya maelfu ya wafanyakazi wahamiaji wakati wa maandalizi ya Kombe la Dunia la 2022. Doha ilijibu kwa kusema kuwa wafanyakazi 37 walifariki, na kati yao watatu tu walikufa kutokana na ajali zinazohusiana na kazi.

Mwenyekiti wa Kamati ya Olimpiki ya Qatar, Sheikh Joaan bin Hamad Al-Thani, alisema kuwa Doha "imefanya michezo kuwa moja ya nguzo kuu za mkakati wa kitaifa," na kuongeza kuwa "asilimia 95 ya miundombinu ya michezo inayohitajika iko tayari, na tuna mpango wa kitaifa wa kuhakikisha kuwa vifaa vyote vitakuwa tayari kwa asilimia 100."

Kwa mujibu wa kanuni za sasa, nchi hazilazimiki kutangaza hadharani nia yao ya kuwania kuwa mwenyeji wa Michezo ya Olimpiki.

Michezo hiyo hufanyika kwa mzunguko wa mabara kila msimu. Kwa kuwa Michezo ya Olimpiki ya 2024, 2028, na 2032 itafanyika Ulaya, Amerika Kaskazini, na Oceania mtawalia, kuna uwezekano mkubwa kwamba Michezo ya 2036 itafanyika Asia au kwa mara ya kwanza Afrika.

Uamuzi wa nchi itakayokuwa mwenyeji wa Michezo ya Olimpiki ijayo utakuwa jukumu muhimu la kwanza kwa Kirsty Coventry, rais wa kwanza mwanamke wa Kamati ya Kimataifa ya Olimpiki (IOC), aliyechaguliwa mwezi uliopita.