Polisi wa Kenya wanawakamata washukiwa 2 na zaidi ya Kilo 110 za meno ya tembo, mpaka wa Namanga

Mamlaka nchini Kenya Jumapili iliwakamata raia wawili wa Tanzania wanaoshukiwa kuhusika katika biashara haramu ya wanyamapori, maafisa walithibitisha.

Kulingana na taarifa iliyotolewa na Mkurugenzi wa Upelelezi wa Makosa ya Jinai wa Kenya DCI, washukiwa hao wawili walinaswa katika hoteli moja katika mpaka wa Namanga wakiwa na takriban kilo 110 za meno ya tembo, ambayo thamani yake inakadiriwa kuwa mamilioni ya shilingi za Kenya ($86000).

Pembe hizo ziligunduliwa zikiwa zimefichwa kwenye buti la gari lililohusishwa na washukiwa, pamoja na vifaa vya kupimia uzito ambavyo wachunguzi wanasema vinaashiria shughuli za ulanguzi uliopangwa.

‘’Kwa kufuatilia taarifa za kijasusi kutoka kwa Huduma ya Kitaifa ya Polisi (NPS) na Huduma ya Wanyamapori ya Kenya (KWS), maafisa walivamia hoteli moja huko Namanga ambapo washukiwa waliripotiwa kukutana na mnunuzi mtarajiwa ili kukamilisha shughuli ya ununuzi wa pembe za ndovu,’’ taarifa ya DCI ilisoma.

Kulingana na DCI, mamlaka imeanzisha msako wa kumtafuta mshukiwa mmoja zaidi ambaye alitoroka eneo la tukio.

Juhudi za Kenya za kupambana na ujangili zimezidi kulenga maeneo ya mpakani kama vile Namanga, njia kuu ya kupita kati ya Kenya na Tanzania, huku utekelezaji wa sheria ukiongeza udhibiti wa vikundi vya uhalifu vinavyofanya kazi kote Afrika Mashariki.

Biashara ya kimataifa ya meno ya tembo ilipigwa marufuku chini ya Mkataba wa Biashara ya Kimataifa ya Wanyama na Mimea Walio Hatarini Kutoweka (CITES) mwaka wa 1989.

Kenya iliunga mkono vikali marufuku hii na ilichukua jukumu muhimu katika kuitetea baada ya kufanya uchomaji moto hadharani mwaka huo huo ili kuangazia janga la ujangili.

Kulingana na Huduma ya Wanyamapori ya Kenya, ujangili umepungua kwa kiasi kikubwa nchini Kenya kutokana na juhudi za kupambana nao zinazozidi kulenga maeneo ya mpakani kama vile Namanga.

Takwimu za KWS zinaonyesha kuwa mwaka wa 2025, idadi ya ndovu waliouawa kwa ajili ya meno yao ilipungua hadi 11 kutoka karibu 100 mwaka wa 2015.