Nijeriya ta ayyana zaman makokin kwana uku kan sojojin da suka mutu a hatsarin jirgin sama a Ondo

Shugaban Nijeriya Bola Ahmed Tinubu ya ayyana zaman makoki na kwana uku a ƙasar domin jimamin jami'an Rundunar Sojin Saman Nijeriya (NAF) da suka rasa rayukansu a hatsarin jirgin sama a Jihar Ondo ranar Litinin.

Kazalika, Shugaban ya bayar da umarnin a sauko da tutocin Nijeriya ƙasa-ƙasa a faɗin ƙasar domin nuna girmamawa ga jami'an da suka rasu, kamar yadda Bayo Onanuga, Mataimaki na Musamman ga Shugaban Kasa kan Harkokin Yaɗa Labarai da Dabaru ya bayyana a shafinsa na X, a ranar 5 ga Oktoba, 2026.

Jirgin saman Rundunar Sojin Saman Nijeriya samfurin ATR-42, wanda ke ɗauke da fasinjoji 25 da ma'aikatan jirgi bakwai, ya yi hatsari ne a kusa da sansanin sojin ruwa a yankin Igbokoda na Jihar Ondo yayin da yake kan aiki daga Benin zuwa Legas.

A sakon ta'aziyya da ya aika wa Babban Hafsan Sojin Sama, Air Marshal Sunday Kelvin Aneke, da sauran jami'ai da sojojin Rundunar Sojin Saman Nijeriya, Tinubu ya bayyana mummunar yanayin a matsayin lokaci mai cike da bakin ciki ga Rundunar Sojin ƙasar da ƙasa baki ɗaya.

"Wannan lokaci ne mai cike da bakin ciki ga Rundunar Sojinmu da kuma ƙasa baki ɗaya. Jami'an Rundunar Sojin Samanmu suna sadaukar da rayukansu a kowace rana domin kare Nijeriya. Ba za a taɓa mantawa da sadaukarwarsu ba," in ji Shugaban.

Tinubu ya ce Babban Hafsan Sojin Sama ya yi masa bayani game da lamarin, inda ya ƙara da cewa ya bayar da umarnin a fara gudanar da cikakken bincike nan-take kan musabbabin hatsarin.

Ya ce binciken ya zama dole domin gano musabbabin hatsarin da kuma hana sake faruwar hakan a nan gaba.

Shugaban ya kuma yaba wa Rundunar Sojin Saman ƙasar bisa ɗaukar matakin gaggawa na fara aikin neman waɗanda hatsarin ya shafa da kuma ceto su.

Fadar Shugaban Ƙasa ta bayyana cewa Rundunar Sojin Saman za ta fitar da sunayen jami'an da suka rasu bayan an sanar wa iyalansu a hukumance.