Netanyahu ya ba da umarnin a kai 'hare-hare masu karfi' kan Gaza

Firaministan Isra'ila, Benjamin Netanyahu, ya umarci sojojin kasar su kai hare-hare masu tsanani a Gaza, bayan ya zargi kungiyar gwagwarmayar Falasdinawa, Hamas, da karya yarjejeniyar tsagaita wuta da Amurka ta jagoranta.

“Bayan tattaunawar tsaro, Firaminista Netanyahu ya umarci sojojin da su gaggauta kai hare-hare masu karfi a Gaza,” in ji wata sanarwa daga ofishinsa a ranar Talata.

A martanin da suka mayar, Hamas ta ce ta dage mika gawar wani mutum da aka yi garkuwa da shi saboda “karya yarjejeniyar tsagaita wuta” da Isra'ila ta yi.

Kungiyar gwagwarmayar Falasdinawa ta bayyana a baya cewa za ta mika gawar wani mutum da aka yi garkuwa da shi a ranar Talata, amma ta dage wannan shirin saboda matsin lamba daga Isra'ila bayan Hamas ta dawo da wasu sassan gawar wani mutum da aka taba gano shi a baya.

“Za mu dage mika gawar da aka tsara a yau saboda karya yarjejeniyar da mamaya suka yi,” in ji bangaren sojojin Hamas a wata sanarwa, suna mai cewa duk wani karin tashin hankali daga Isra'ila zai kawo cikas ga bincike, tono, da dawo da gawarwakin.

A daren Litinin, Hamas ta mika abin da ta ce shi ne gawar mutum na 16 daga cikin mutane 28 da aka amince za a dawo da su karkashin yarjejeniyar tsagaita wuta, wadda ta fara aiki a ranar 10 ga Oktoba.