Burnham ameyaita makubaliano hayo kuwa ni "mafanikio makubwa," huku Kiongozi wa Tume ya Umoja wa Ulaya, von der Leyen, akisema ni "mabadiliko ya kihistoria" katika mahusiano.

Muongo mmoja wa Brexit, EU na Uingereza zasaini makubaliano ya 'kihistoria' mjini Brussels

Waziri Mkuu wa Uingereza, Andy Burnham, na viongozi wakuu wa Umoja wa Ulaya (EU) wametia saini makubaliano ya kurahisisha biashara na uhamaji wa vijana katika mkutano wa kilele mjini Brussels. Mkutano huo umetajwa kuwa hatua ya kwanza katika juhudi za kujenga upya uhusiano baada ya Brexit.

Siku ya Ijumaa, mazungumzo mjini Brussels yalihusu makubaliano makuu matatu: makubaliano ya kupunguza urasimu katika usafirishaji wa vyakula nje ya nchi, makubaliano ya kuunganisha mifumo ya pande hizo mbili ya biashara ya uzalishaji wa hewa chafu, na makubaliano ya tatu kuhusu "mpango wa uzoefu kwa vijana."

Miaka kumi baada ya Waingereza kupiga kura ya kujiondoa katika umoja huo, Burnham alipeana mkono na viongozi wa EU, Ursula von der Leyen na Antonio Costa.

Hata hivyo, kulijitokeza kikwazo kinachowezekana huku umoja huo wenye mataifa 27 na Uingereza wakivutana kuhusu kuunganisha utekelezaji wa mwisho wa makubaliano hayo na Uingereza kukubali kupunguza ada za vyuo vikuu kwa wanafunzi wa EU.

Serikali ya Uingereza ilisisitiza kuwa makubaliano hayo "yamekamilika," ingawa mazungumzo kuhusu ada za masomo yataendelea kwa miezi sita ijayo. Hata hivyo, taarifa kutoka nchi za EU ilisema kuwa zitasubiri kuidhinisha makubaliano hayo mpaka pale makubaliano ya ada yatakapofikiwa.

"Hii ni siku njema kwa Uingereza. Hii ni siku njema kwa Ulaya," Burnham aliwaambia waliohudhuria, akielezea makubaliano hayo kuwa "ya kihistoria." Von der Leyen wa EU kwa upande wake alisema ni "kipindi cha mabadiliko" katika uhusiano wao.

Burnham anasema hatua hizo, ambazo zilikuwa zikiandaliwa kwa muda mrefu kabla hajakuwa Waziri Mkuu, zitasaidia kurekebisha baadhi ya madhara yaliyosababishwa na Brexit. Kampuni za Uingereza zitaweza tena kusafirisha bidhaa Ulaya kwa urahisi zaidi, na vijana 100,000 walio chini ya umri wa miaka 30 kutoka kila upande wataruhusiwa kuishi hadi miaka mitatu katika eneo la upande mwingine kwa ajili ya kazi, masomo au usafiri.

Maamuzi makubwa zaidi

Tangu aingie madarakani majira ya kiangazi mwaka huu, Waziri Mkuu huyo amevunja miiko iliyokuwepo katika mjadala wa Uingereza kuhusu uhusiano wake na Ulaya, hata kufikia hatua ya kupendekeza kuwa siku moja nchi hiyo inaweza kujiunga tena na umoja huo.

Ingawa mkutano huo ulijikita katika hatua ndogo ndogo, Burnham amesema ataacha maamuzi makubwa kuhusu mustakabali kwa wakati mwingine. Kabla ya mkutano, alisema Uingereza itaanzisha baadaye "majadiliano na washirika wetu wa EU kuhusu chaguo za uhusiano wetu wa muda mrefu".

Burnham, aliyewahi kuwa meya wa Manchester, ambaye awali alisema angependa kuiona Uingereza ikijiunga tena na EU katika uhai wake, ameahidi kuweka wazi njia mbalimbali, kuanzia kuacha mambo kama yalivyo, kujiunga na umoja wa forodha, hadi kujiunga tena na umoja huo kikamilifu.

Mkakati huo unaendana na kura za maoni ambazo sasa mara nyingi zinaonyesha kuwa Waingereza wengi wanajutia Brexit na wangepiga kura ya kujiunga tena na umoja huo endapo kura ya maoni ingefanyika kesho.

TRT Afrika — TRT Afrika

Picha: Reuters (Wire)

#