Muhammadu Buhari: Rais wa zamani wa Nigeria afariki dunia akiwa na umri wa miaka 82

Rais wa zamani wa Nigeria Muhammadu Buhari amefariki dunia akiwa na umri wa miaka 82.

Buhari alifariki alipokuwa akipatiwa matibabu katika hospitali moja mjini London, Uingereza, msaidizi wake wa zamani wa vyombo vya habari vya kidijitali Bashir Ahmad alisema katika taarifa yake kwenye mtandao wa X siku ya Jumapili.

"Familia ya rais wa zamani imetangaza kufariki kwa rais wa zamani, Muhammadu Buhari, mchana wa leo katika kliniki moja huko London," Ahmad alisema.

Kufuatia kifo cha Buhari, Rais wa Nigeria Bola Tinubu alimuagiza Makamu wa Rais Kashim Shettima kusafiri hadi Uingereza kuandamana na mabaki ya Rais wa zamani Buhari.

Bendera kupepea nusu mlingoti

Rais Tinubu pia aliamuru kwamba bendera zote katika taifa hilo la Afrika Magharibi lazima zipepee nusu mlingoti huku nchi hiyo ikiomboleza kifo cha Buhari.

"Rais Buhari alifariki leo (Jumapili) mjini London mwendo wa saa 4:30 usiku, kufuatia kuugua kwa muda mrefu," Mshauri Maalum wa Rais Tinubu kwa Habari na Mikakati Bayo Onanuga alisema katika taarifa yake kuhusu X.

"Rais Tinubu amezungumza na Bi Aisha Buhari, mjane wa rais wa zamani na kutoa rambirambi zake," Onanuga alisema.

Buhari alihudumu kama rais mteule wa Nigeria kwa mihula miwili mfululizo, baada ya kushinda uchaguzi mwaka 2015 na tena 2019.

Mkuu wa nchi wa kijeshi

Hapo awali aliwahi kuwa mkuu wa nchi ya Nigeria, ingawa kama mtawala wa kijeshi kutoka Desemba 1983 hadi Agosti 1985.

Wakati huo, jeshi lilikuwa limeipindua serikali ya Rais Shehu Shagari juu ya hali duni ya kiuchumi ya Nigeria wakati huo na ufisadi serikalini.

Wakati wa awamu yake ya pili kama rais, Buhari alisafiri hadi Uingereza mara kadhaa kwa matibabu.

Mnamo mwaka wa 2017, Buhari alitumia zaidi ya siku 50 nje ya nchi, akimwagiza Makamu wa Rais wa wakati huo Yemi Osinbajo kukaimu kama rais wakati hayupo.