Hukumar Alhazai ta Nijar ta yi shelar fara rajistar maniyyata Hajjin 2026 a manhajar GAHO

Hukumar Kula da Aikin Hajji da Umra ta ƙasar Nijar (COHO) ta buɗe rajistar Aikin Hajji ga maniyyata Hajji da Umra na shekarar 2026 a kan manhajarta ta GAHO.

"Hukumar Kula da Aikin Hajji da Umra (COHO) na sanar da masu ruwa da tsaki a Aikin Hajji (shugabannin kamfanonin Aikin Hajji da maniyyata da sauransu) cewa an buɗe manhajar GAHO domin rajistar maniyyatan Hajjin 2026/1447 ranar Asabar, 6 ga watan Satumban 2025 da ƙarfe 12 na rana.

“Sannan za a rufe ta ranar 30 ga watan Nuwamban 2025 da misalin ƙarfe  6 n yamma, wani wa’adin da ba za a sauya ba," in ji hukumar COHO a wata sanarwa.