Fiye da mutum 55,000 daga Sudan sun tsere zuwa gabashin Chadi don gudun hijira

Fiye da ’yan gudun hijirar Sudan 55,000 ne suka tsere zuwa gabashin Chadi tun farkon wannan shekara, yayin da ake ci gaba da faɗa da fuskantar taɓarɓarewar tsaro wanda ke tilasta wa mutane barin muhallansu, in ji Hukumar Kula da ’Yan Gudun Hijira ta Majalisar Ɗinkin Duniya (UNHCR) a ranar Jumma’a.

Mamadou Dian Balde, wanda shi ne mai kula da harkokin ’yan gudun hijirar yankin na Majalisar Ɗinkin Duniya kan rikicin Sudan, ya shaida wa manema labarai a Geneva cewa fiye da mutane 400 ne ke tsallakawa ta yankunan kan iyakar Adre da Tine a kowace rana cikin makon da ya gabata. Wannan adadi ya ninka yawan mutanen da ke tsallakawa a kullum a ’yan watannin nan kusan sau 20.

Tun bayan ɓarkewar yaƙin Sudan a watan Afrilun 2023, kusan ’yan gudun hijira miliyan ɗaya ne suka tsallaka zuwa Chadi.

Balde ya ce har yanzu halin da ake ciki a Darfur na da matuƙar muni, yayin da faɗace-faɗace, hare-haren jiragen sama da na jirage marasa matuƙa a jihohin Kordofan da Blue Nile su ma ke tilasta wa mutane tserewa.

Sudan na ci gaba da fuskantar mafi girman rikici na raba mutane da muhallansu mafi girma a duniya, inda kusan mutane miliyan 11.3 suka rasa muhallansu ba da son ransu ba, ciki har da miliyan 6.4 da suka rasa matsugunansu a cikin ƙasar.

A cewar UNHCR, fiye da ’yan Sudan miliyan 3.5 ne suka tsere zuwa ƙasashen yankin, inda suke neman mafaka ko gudun hijira.

Hukumar ta ce ta samu kashi 18 cikin 100 ne kawai na dala biliyan 1.6 da ake buƙata domin shirin mayar da martani ga matsalar ’yan gudun hijirar yankin.

Balde ya ce: “Ba tare da ƙarin tallafin jin ƙai ba, halin da miliyoyin mutanen da suka rasa matsugunansu ke ciki zai ƙara taɓarɓarewa, lamarin da zai ƙara matsa wa ’yan gudun hijira lamba su yanke shawarwari masu matuƙar wahala, kamar komawa Sudan kafin a samu zaman lafiya ko kuma yin tafiye-tafiye masu haɗari zuwa wasu wurare domin neman tsaro da kwanciyar hankali.”