Ushindi wa vita dhidi ya ugaidi: Kampeni ya kijeshi ya Uturuki yalazimisha kundi la PKK kuvunjika

Wanachama wa kundi la kigaidi la PKK wameanza kuweka chini silaha zao katika jimbo la Suleymaniye nchini Iraq siku ya Ijumaa, jambo ambalo linaendana na juhudi za Ankara za kufanya Uturuki kuwa bila magaidi.

Baada ya operesheni ndefu na madhubuti za kupambana na ugaidi zinazoongozwa na vikosi vya usalama vya Uturuki, PKK ilitangaza mwezi Mei kwamba litajivunja na kuachia silaha, na hivyo kuashiria hatua kubwa katika mapambano ya miongo kadhaa ya nchi hiyo dhidi ya ugaidi.

Wakati huo huo, taifa la Uturuki limepanua vita vyake dhidi ya ugaidi katika majukwaa ya kidiplomasia.

Miaka ya shinikizo thabiti kwa washirika wa kimataifa - haswa Ulaya na Mashariki ya Kati - ilizaa matunda.

Uwezo wa PKK kufanya kazi kwa uhuru katika miji mikuu ya kigeni, utakatishaji fedha, na kukusanya fedha kupitia masuala mbalimbali ya kisiasa umepungua kwa kiasi kikubwa.

Kukua kwa nguvu za kijiografia za Uturuki kumefanya masuala yanayoitia wasiwasi kuchukuliwa kwa uzito na nchi zenye nguvu duniani.

Kupitia mahusiano ya kiuchumi, diplomasia ya nishati, na ushirikiano wa kikanda, Ankara pole pole imezima mitandao ya msaada ya PKK nje ya nchi.

Msemaji wa Chama cha Haki na Maendeleo cha Rais Recep Tayyip Erdogan (AK Party) alisema Jumatano kwamba kuachia kwa kundi hilo silaha inapaswa kukamilika ndani ya miezi michache.

Katika mahojiano na shirika la utangazaji la NTV, Omer Celik alieleza kuwa timu ya uthibitishaji - inayoundwa na maafisa wa ujasusi wa Uturuki na vikosi vya jeshi - itafuatilia mchakato wa kupokonya silaha.

"Mchakato wa kupokonya silaha (nchini Iraq) unahitaji kukamilika ndani ya miezi mitatu hadi mitano ... Iwapo utazidi kipindi hiki, itakuwa katika hatari ya uchokozi," Celik alisema.

Kwa zaidi ya miaka 40, Uturuki imekuwa ikipambana na PKK, ambayo imeua zaidi ya watu 40,000 kupitia mashambulizi dhidi ya raia na vikosi vya usalama vya Uturuki.