Paul Biya ya sanar da cewa za a yi zaɓen Shugaban Ƙasa a Kamaru a Oktoban 2025

Kamaru za ta gudanar da zaben Shugaban Ƙasa a ranar 12 ga watan Oktoba, kamar yadda wata sanarwa da Shugaban kasar Paul Biya ya sanya wa hannu ta nuna a ranar Juma’a.

Zaben zai tantance wanda zai jagoranci wannan kasa mai arzikin koko da mai, wadda ke da kusan mutum miliyan 30, na tsawon shekaru bakwai masu zuwa.

Masu sha’awar tsayawa takara dole ne su gabatar da takardunsu na neman tsayawa cikin kwanaki goma bayan an kira taron masu zabe, kamar yadda dokar zabe ta tanada.

Biya, wanda shi ne Shugaban Ƙasa mafi tsufa a duniya da yake da shekaru 92 a kan mulki, kuma ya hau karagar mulki tun a shekarar 1982, fiye da shekaru 40 da suka gabata.

Amma bai bayyana ko zai sake tsayawa takara ba har yanzu.

A shekarar 2018, ya lashe zaben da kashi 71.28% na kuri’un da aka kada, a cewar sakamakon hukuma, duk da cewa ‘yan adawa sun yi ikirarin cewa an tafka magudi sosai.

Gyaran kundin tsarin mulki da aka yi a shekarar 2008 ya cire iyaka ga wa’adin mulkin Shugaban Ƙasa, wanda hakan ya ba shi damar tsayawa takara ba tare da iyaka ba.