Umoja wa wanafunzi Afrika Kusini wataka shule zifungwe kufuatia mgomo wa usafiri wa wanafunzi

Bunge la Wanafunzi wa Afrika Kusini (COSAS) limetaka Idara ya Elimu ya Gauteng kufunga shule zote katika mkoa huo hadi pale mgogoro wa usafiri wa wanafunzi utakapotatuliwa.

Maelfu ya wanafunzi wanashindwa kuhudhuria darasani kutokana na mgomo wa usafiri wa wanafunzi unaoendelea, huku kukiwa na mvutano wa malipo kati ya watoa huduma na idara ya elimu ya mkoa.

Baraza la Watoa Huduma ya Usafiri la Gauteng limesema idadi kubwa ya wanachama wake hawajapokea malipo wanayodai, na kuwafanya watoa huduma ya usafiri kwa wanafunzi kusitisha huduma.

Mgogoro huo unakuja huku kukiwa na wasiwasi juu ya usalama wa usafiri wa wanafunzi kufuatia ajali ya hivi karibuni ya Vanderbijlpark ambapo wanafunzi 14 walipoteza maisha baada ya gari yao kupata ajali.

‘Uendeshaji wa kizembe’

Dereva wa usafiri wa wanafunzi mwenye umri wa miaka 22 anatarajiwa kufikishwa katika Mahakama ya Wilaya ya Vanderbijlpark, kwa makosa kadhaa ikiwemo kuua kwa uzembe pamoja na kupuuza sheria za usalama barabarani.

Mamlaka zimeongeza ufuatiliaji dhidi ya vitendo vya uvunjifu wa sheria za usalama wa usafiri wa wanafunzi. Hii inafuatia tukio jingine la Lenasia, kusini mwa Johannesburg, ambapo dereva wa gari ndogo ya wanafunzi alikamatwa kwa kusafirisha zaidi ya wanafunzi 20 katika gari moja na kufanya kazi bila kibali halali.

Polisi tangu wakati huo wameanza msako wa magari na kuwakamata madereva wasio na leseni, jambo ambalo limesababisha maandamano kutoka kwa waendeshaji wa usafiri wa wanafunzi ambao wanasema utekelezaji huo umeongeza mvutano katika sekta hiyo.