Ukraine da Rasha sun cim ma wata babbar yarjejeniyar musayar fursunoni a Istanbul

Ukraine da Rasha sun cim ma wata babbar yarjejeniya a birnin Istanbul na Turkiyya don gudanar da musayar fursunoni da gawawwaki mafi girma tun bayan fara yaƙin a watan Fabrairun 2022, kamar yadda jami'ai daga ɓangarorin biyu suka tabbatar bayan tattaunawar zaman lafiya da Turkiyya ta shirya.

“Mun amince da musayar daidai wa daida ta fursunonin yaki masu raunuka da waɗanda suke cikin tsananin rashin lafiya. Rukunin na biyu kuwa ya haɗa da matasan sojoji masu shekaru 18 zuwa 25,” in ji Ministan Tsaron Ukraine, Rustem Umerov, a wani taron manema labarai a ranar Litinin.

Ya kara da cewa, “Mun kuma amince da dawo da gawawwakin sojoji 6,000 sannan a ba mu 6,000,” kamar yadda ya ƙara da cewa. Ya jaddada cewa duk da cewa yarjejeniyar ta fi mayar da hankali kan wasu rukuni na musamman maimakon adadi, bangaren jin kai ya kasance a fili.

Umerov ya sake nanata bukatun Kiev na gaba, yana cewa: “Muna dagewa kan sakin dukkan fursunoni da dawo da dukkan mutanenmu da aka kama da kuma yara da aka sace.”

Vladimir Medinsky, shugaban tawagar Rasha, shi ma ya tabbatar da yarjejeniyar.

Da yake magana da 'yan jarida, ya ce: “Moscow da Kiev sun amince da musayar fursunonin yaki mafi girma a tarihi wadda ta shafi waɗanda suka ji rauni sosai da matasan sojoji masu shekaru 18 zuwa 25.”

Ya kara da cewa Moscow za ta mayar da gawawwakin sojojin Ukraine 6,000.

Sabon zagaye

An kammala yarjejeniyar ne yayin zagaye na biyu na tattaunawa a Fadar Ciragan da ke Istanbul, inda kokarin shiga tsakani na Turkiyya ya sake haɗa ɓangarorin biyu.

Shugaban Ukraine, Volodymyr Zelenskyy, shi ma ya sanar da cewa Moscow da Kiev sun amince da gudanar da wani zagaye na musayar fursunonin yaki.

Da yake magana a wani taron manema labarai a babban birnin Lithuania, Vilnius, Zelenskyy ya ce tawagogin sun yi musayar takardu ta hannun Turkiyya a taron da aka gudanar a Fadar Ciragan da ke Istanbul. “Muna shirin sakin fursunonin yaki,” in ji shi.

Ankara ta karbi bakuncin manyan tattaunawar diflomasiyya tun farkon makonnin yakin, ciki har da taruka masu cike da tarihi a Antalya da ofishin shugaban ƙasa na Dolmabahce da ke Istanbul.