Misri imepokea watalii milioni 19 mwaka 2025: Waziri

Sekta ya utalii ya Misri ilifikia kiwango cha kihistoria mwaka 2025, ikipokea karibu wageni milioni 19 - ongezeko la asilimia 21 ikilinganishwa na mwaka uliopita, kwa mujibu wa Wizara ya Utalii nchini humo.

Waziri wa Utalii, Sherif Fathy, alielezea takwimu hizi kama mafanikio makubwa, akisema zinaonyesha nafasi thabiti ya ushindani ya Misri katika soko la utalii duniani. Alisema kuwa ongezeko hilo linatokana na usalama na utulivu uliopo nchini humo, uboreshaji wa huduma.

Viwanja vikuu vya ndege, ikiwa ni pamoja na Cairo, Hurghada, Sharm El-Sheikh na Marsa Alam, vilikuwa ni sehemu kubwa ya kupokea wageni, jambo linaloonyesha usambazaji mpana wa vituo vya utalii vya Misri na athari za uwekezaji unaoendelea katika uboreshaji wa viwanja vya ndege na miundombinu ya utalii, alisema Fathy katika taarifa yake iliyochapishwa nchini Misri.

Ziara za maeneo ya kihistoria na makumbusho kote nchini pia ziliongezeka kwa kiasi kikubwa. Misri ilirekodi wageni wa kigeni milioni 18.6 waliotembelea maeneo ya urithi mwaka 2025 - ikijumuisha Jumba la Taifa la Utamaduni wa Misri na Jumba Kuu la Misri - ikionyesha ongezeko la asilimia 33.5 ikilinganishwa na 2024.