Kiristoci Falasɗinawa sun gudanar da bukukuwan Kirsimeti a Gaza da Gaɓar Yamma

Dubban Kiristoci Falasdinawa sun gudanar da bukukuwan Kirsimeti a bainar jama'a a Gaza da aka yi wa ƙawanya da kuma Gaɓar Yammacin Kogin Jordan da aka mamaye a karon farko tun bayan fara kisan ƙare-dangi a yankin a watan Oktoban 2023.

A cikin shekaru biyu da suka gabata, an dakatar da bukukuwan Kirsimeti a Gaza saboda zaluncin Isra'ila. Ko dai an rufe su ko kuma an soke su gaba ɗaya a Gaɓar Yamma da aka mamaye don nuna goyon baya ga Falasɗinawa a yankin da aka yi wa ƙawanya.

A Bethlehem, wurin haihuwar Annabi Isa Alaihissalam, dubban mutane sun yi tattaki a kan tituna, tare da bukukuwa cike da murna, suna sanye da kayan Santa Claus suna kiɗa da waƙa.

A Gaza, domin bikin Kirsimeti, Falasɗinawa sun je Cocin Iyali Mai Tsarki, wadda ta lalace sakamakon hare-haren Isra'ila kuma ta zama mafaka ga Falasɗinawa da aka raba da gidajensu.