Kiongozi wa upinzani Uganda alaani mashambulizi ya maafisa wa usalama

Mgombea wa urais wa upinzani nchini Uganda, Bobi Wine, amesema kwamba yeye pamoja na wasaidizi na wafuasi wake walipigwa na maafisa wa usalama wakati wa kampeni kaskazini mwa nchi, ikiwa ni hatua mpya ya vurugu inayoendelea kuongezeka kuelekea Uchaguzi Mkuu uliopangwa kufanyika Januari 15.

Bobi Wine, ambaye jina lake halisi ni Robert Kyagulanyi, anashindana na Rais Yoweri Museveni, mwenye umri wa miaka 81, kwa mara ya pili baada ya kushika nafasi ya pili katika uchaguzi wa mwaka 2021.

“Wahalifu waliovalia sare za polisi na jeshi walitushambulia kwa fimbo na mawe na kuanza kuwapiga watu wetu,” alisema katika chapisho mojawapo. “Mmoja wa wahuni alinipiga usoni kwa fimbo… wanaharakati kadhaa wamelazwa hospitalini.”

Msemaji wa jeshi, Chris Magezi, aliwatuhumu Bobi Wine na wafuasi wake kwa kuandaa maandamano yasiyo halali na kufanya kampeni nje ya muda uliopangwa. “Vikosi vya usalama vipo kuhakikisha kila mtu anafuata sheria,” alisema.

Bobi Wine alisema mmoja wa wasaidizi wake alipigwa kichwani na akachapisha picha ikionyesha damu ikimtoka. Aliongeza kuwa vifaa vya kampeni, ikiwemo viliharibiwa.

Video aliyoisambaza ilionyesha kile kinachoonekana kuwa kundi kubwa la wanajeshi na polisi wakiwapiga watu kwa fimbo.

Katika taarifa iliyotolewa Jumatano, Mkuu wa Haki za Binadamu wa Umoja wa Mataifa, Volker Türk, alilaani kile alichokiita “ukandamizaji unaozidi kukithiri” dhidi ya upinzani nchini Uganda na kusema kwamba takribani wafuasi 550 wa chama cha Bobi Wine, National Unity Platform, wamekamatwa mwaka huu.