Jeshi lasitisha mchakato wa uchaguzi nchini Guinea-Bissau, latangaza kuchukua udhibiti

Kundi la maafisa wa jeshi nchini Guinea-Bissau Jumatano limesitisha mchakato wa uchaguzi na kusema kuwa nchi sasa iko chini ya udhibiti wao “hadi taarifa nyingine itakapotolewa,” wamesema hayo kupitia chombo cha habari cha serikali.

Maafisa hao wanaojiita “Uongozi wa Juu wa Kijeshi kwa Marejesho ya Utulivu” walisoma taarifa katika makao makuu ya jeshi wakieleza hatua walizochukua.

Walitangaza kusitishwa kwa mchakato unaoendelea wa uchaguzi, kufuta matokeo ya uchaguzi wa rais na bunge, pamoja na kusitisha vipindi vya vyombo vya habari, huku wakitoa wito kwa wananchi “kubaki watulivu.”

Hatua hiyo ya kijeshi imekuja kufuatia taarifa za milio ya risasi karibu na ikulu ya rais ya Guinea-Bissau siku ya Jumatano.

Fernando Dias, mgombea huru, Rais aliyoko madarakani, Umaro Sissoco Embaló, wote walidai ushindi Jumatatu katika uchaguzi wa urais uliofanyika mwishoni mwa wiki huku nchi ikisubiri matokeo.

Domingos Simoes Pereira wa Chama cha African Party for the Independence of Guinea and Cape Verde (PAIGC), ambacho kiliongoza harakati za ukombozi kutoka Ureno mwaka 1974, alizuiwa kushiriki uchaguzi wa mwaka huu baada ya mamlaka kudai kuwa aliwasilisha nyaraka zake kwa kuchelewa.

Milio ya risasi pia ilisikika karibu na ofisi za tume ya uchaguzi majira ya mchana, kwa mujibu wa chanzo cha Kifaransa kilichonukuu vyanzo kadhaa.

Mapema Jumatano, Dias aliitaka jeshi kutoegemea upande wowote na kutojiingiza katika mchakato wa uchaguzi, na kuruhusu uendelee kama ulivyoanza, huku akisisitiza kudai ushindi wake.

“Hatuiombi chochote,” aliwaambia waandishi wa habari, akiongeza kuwa atasubiri matokeo rasmi yatangazwe Alhamisi.

Tume ya uchaguzi iliahidi kutangaza matokeo ya mwisho ya uchaguzi kufikia Alhamisi.

Ilitoa onyo kwa wapiga kura, wagombea, vyama vya siasa, miungano ya uchaguzi na vyombo vya habari dhidi ya kutangaza matokeo yoyote kabla ya muda rasmi.