JD Vance anaongoza juhudi za kimya kimya kwa ajili ya makubaliano mapya ya Marekani na Iran
Mhariri:
Faidha Khamis Juma
Axios inataja vyanzo vinavyosema kuwa Vance amekuwa akizungumza na wapatanishi, wakiwemo Qatar na Pakistan, kwa wiki mbili zilizopita ili kufikia makubaliano, na kuongeza kuwa wajumbe Witkoff na Jared Kushner walihusika.
Makamu wa Rais wa Marekani, JD Vance, amehusika binafsi katika mazungumzo yasiyo ya moja kwa moja na Iran kwa wiki mbili zilizopita, kwa lengo la kufikia makubaliano mapya ya kusitisha mapigano na kuanzisha upya mazungumzo kuhusu masuala ya nyuklia, kwa mujibu wa ripoti moja.
Chombo cha habari cha Axios, kikinukuu vyanzo viwili vyenye ufahamu wa suala hilo, kiliripoti siku ya Ijumaa kuwa Vance amekuwa akiwasiliana karibu kila siku na Waziri Mkuu wa Qatar, Sheikh Mohammed bin Abdulrahman Al-Thani, Mkuu wa Majeshi ya Pakistan, Field Marshal Asim Munir, pamoja na wapatanishi wengine.
Mjumbe wa Ikulu ya Marekani (White House), Steve Witkoff, na mshauri wa rais, Jared Kushner, pia wanahusika katika mchakato huo.
Vyanzo hivyo vilisema kuwa Vance na wapatanishi hao wamejadili uwezekano wa kufanyika kwa mkutano wa kiufundi kati ya pande hizo mbili katika siku zijazo, ingawa mkutano huo bado haujafanyika.
Ripoti hiyo inaeleza kuwa, wiki mbili zilizopita, Vance alituma barua kwa Mohsen Rezaei, Katibu wa Baraza Kuu la Usalama wa Taifa la Iran, akipendekeza kurejea kwenye mazungumzo ya moja kwa moja. Maafisa wa Iran walisema barua hiyo ilileta mwelekeo chanya.
Umuhimu wa kuendeleza mazungumzo
Rais Donald Trump, pamoja na wanachama wengi wa chama cha Republican, walilaumu vita dhidi ya Iran kwa kushindwa vibaya katika uchaguzi wa katikati ya muhula.
Vance pia alisema kuwa vita dhidi ya Iran ndiyo sababu kuu iliyopelekea chama cha Republican kukataliwa na wapiga kura katika uchaguzi wa katikati ya muhula nchini Marekani wiki hii; na wakati Trump akitetea vita hivyo, Vance alihoji kama vina tija yoyote.
Trump alizungumza na Amir wa Qatar, Sheikh Tamim bin Hamad Al Thani, siku ya Ijumaa.
Kwa mujibu wa taarifa kutoka ofisi yake, Sheikh Tamim alisisitiza umuhimu wa kuendeleza mazungumzo na kuepuka kuongezeka zaidi kwa mvutano katika eneo hilo.
TRT Afrika / TRT World — TRT Afrika / TRT World
Habari zinazohusiana
Rais wa Israel kutangaza siku ya Jumapili atakayeunda serikali mpya nchini humo
Rais Isaac Herzog anafanya mashauriano na vyama vya kisiasa kufuatia uchaguzi wa tarehe 27 Oktoba, ambapo hakuna aliyepata wingi wa kura kati ya Netanyahu wala Eisenkot.
Bunge la Uturuki lauidhinisha Mkataba wa Ulinzi wa Makkah
Mwenyekiti wa Kamati ya Mambo ya Nje ya Bunge la Uturuki, Fuat Oktay, amesema kuwa muungano huo unalenga masuala ya ulinzi pekee na si kuishambulia nchi nyingine.
Rais Erdogan anatarajiwa kuzuru Azerbaijan kwa Sikukuu ya Ushindi, asisitiza undugu 'thabiti'
Rais wa Uturuki anasema anatarajiwa kuwa kuwepo kwa sherehe za Novemba 8 jijini Baku, ni ishara ya historia ya pamoja, utamaduni na uhusiano wa karibu wa kidiplomasia kati ya mataifa hayo mawili.
