Farashin ɗanyen mai ya yi tashin gwauron zabo saboda rikicin Gabas ta Tsakiya

Farashin ɗanyen mai a kasuwannin duniya ya yi tashin gwauron zabo a ranar Juma’a sakamakon fargabar tangarɗar samar da mai da kuma matsalolin sufuri da suka biyo bayan rikicin da ke ƙara tsananta a Gabas ta Tsakiya.

Rikicin da ya ɓarke tsakanin Amurka da Isra’ila a kan Iran tare da martanin ramuwar gayya daga Tehran a yankin Gulf ya janyo tashin hankali a bangarorin makamashi da sufuri na duniya, lamarin da ya haifar da rufe Mashigar Hormuz.

Rahotanni sun nuna cewa farashin ɗanyen mai ya kai dala 92.69 a kowace ganga, inda ya ƙaru da kashi 8.5 cikin 100 a rana guda, kuma kusan kashi 30 cikin 100 cikin mako ɗaya.

Haka kuma farashin ɗanyen man West Texas Intermediate (WTI) ya tashi da sama da kashi 12 cikin 100 zuwa fiye da dala 90 a kowace ganga, wanda ake cewa shi ne mafi girman tashin mako-mako da aka taɓa gani.

Mashigar Hormuz na daga cikin muhimman hanyoyin jigilar mai a duniya, inda kusan kashi ɗaya cikin biyar na ɗanyen mai da iskar gas na duniya ke bi ta wannan hanya. Amma rahotanni sun nuna cewa zirga-zirgar jiragen ruwa ta kusan tsaya cik a yankin sakamakon rikicin.

Da farko wasu ‘yan kasuwa sun yi zaton rikicin zai kasance na ɗan lokaci kaɗan, amma bayan shugaban Amurka Donald Trump ya bayyana cewa dole ne Iran ta “miƙa wuya” kafin a kawo ƙarshen yaƙin, fargabar tsawaitar rikicin ta ƙaru.

Daraktar bincike a kamfanin XTB, Kathleen Brooks, ta ce kalaman Trump sun rage fatan cewa rikicin zai warware cikin gaggawa, abin da ya sa farashin mai ya ci gaba da tashi a kasuwannin duniya.

Tushen labari: Newstimehub