Binti wa Zuma ajiuzulu ubunge Afrika Kusini

Duduzile Zuma-Sambudla, binti wa rais wa zamani wa Afrika Kusini Jacob Zuma, amejiuzulu kutoka bunge kufuatia madai kwamba aliwarubuni watu 17 waende kupigana upande wa Urusi nchini Ukraine, chama chake kilisema Ijumaa.

Zuma-Sambudla alikuwa mbunge wa chama cha upinzani cha Umkhonto weSizwe (MK) kinachoongozwa na baba yake. Maafisa wa chama cha MK walisema alijiuzulu kwa hiari, na kwamba kuondoka kwake kutoka Bunge la Kitaifa na majukumu yote ya umma kunaanza kutekelezwa mara moja.

Nathi Nhleko, mratibu wa kitaifa wa chama cha MK, aliwaambia waandishi wa habari kwamba chama cha MK hakikuhusika katika kuwarubuni wanaume hao kwenda Urusi, na kwamba kujiuzulu kwa Zuma-Sambudla haimaanishi kuwa ana hatia. Hata hivyo, aliongeza kuwa cha cha MK kitasaidia familia za wanaume hao.

“Viongozi wa kitaifa wamekubali uamuzi wa kamredi Duduzile Zuma-Sambudla kujiuzulu na wanaunga mkono juhudi zake za kuhakikisha kuwa vijana hawa wa Afrika Kusini wanarejeshwa salama kwa familia zao,” alisema.

Uchunguzi waanzishwa

Siku ya Jumapili, polisi walisema watachunguza mashitaka dhidi ya Zuma-Sambudla baada ya dada yake wa kambo, Nkosazana Zuma-Mncube, kuwasilisha ombi rasmi la kufanyika kwa uchunguzi dhidi yake na watu wengine wawili, akiwatuhumu kuhusika katika tuhuma hiyo.

Zuma-Sambudla alikuwepo kwenye mkutano huo na waandishi wa habari lakini hakuzungumza, na hadi sasa hajajibu hadharani madai yaliyotolewa na dada yake wa kambo.

Serikali ya Afrika Kusini ilisema mwezi huu kwamba raia wake 17 wamekwama katika eneo la Donbas nchini Ukraine baada ya kudanganywa kujiunga na vikosi vya mamluki kwa ahadi ya mikataba yenye malipo makubwa. Ilisema inafanya kazi ya kuwarejesha nyumbani na inachunguza namna walivyofikishwa huko.

Zaidi ya raia 1,400 kutoka nchi kadhaa za Afrika wanapigana pamoja na vikosi vya Urusi nchini Ukraine, waziri wa mambo ya nje wa Kyiv alisema mwezi huu, akihimiza nchi hizo kuwaonya raia wao dhidi ya uandikishaji huo.