Waasi wajiondoa katika mji muhimu wa DRC kufuatia ombi la Marekani

Marekani imekosoa vikali kutekwa kwa mji huo wiki iliyopita, ikisema kuwa hatua hiyo ilihatarisha juhudi za upatanishi wa amani.

Waasi wa M23 waliingia Uvira—uliopo mpakani mwa Congo na Burundi—chini ya wiki moja baada ya marais wa Congo na Rwanda kukutana na Rais wa Marekani, Donald Trump, mjini Washington na kuthibitisha dhamira yao ya kuheshimu makubaliano ya amani yanayojulikana kama Makubaliano ya Washington.

Waziri wa Mambo ya Nje wa Marekani, Marco Rubio, alisema Jumamosi kwamba hatua za Rwanda mashariki mwa Congo zilikiuka Makubaliano ya Washington, na akaahidi kuchukua hatua kuhakikisha ahadi zilizotolewa kwa Rais wa Marekani zinatekelezwa.

Ripoti ya kundi la wataalamu wa Umoja wa Mataifa iliyotolewa mwezi Julai ilidai kuwa Rwanda ilikuwa na udhibiti na ushawishi wa moja kwa moja juu ya waasi hao. Rwanda imekanusha tuhuma hizo na badala yake imewalaumu majeshi ya Congo na Burundi kwa kuzuka tena kwa mapigano.

Kiongozi wa Muungano wa Waasi wa Mto Congo, Corneille Nangaa, aliandika kwenye mtandao wa X usiku wa kuamkia leo kwamba waasi watajiondoa katika mji huo. Alisema hatua hiyo ni ya upande mmoja na inalenga kujenga imani ili kutoa nafasi kubwa kwa mafanikio ya mchakato wa amani wa Doha.

Mazungumzo sambamba

Kundi la M23 halishiriki moja kwa moja katika mazungumzo ya amani yanayosimamiwa na Marekani, bali linahusika katika mazungumzo tofauti na sambamba na serikali ya Congo, yanayofanyika nchini Qatar.

Hata hivyo, mwanaharakati mmoja wa jamii ya kiraia mjini Uvira aliliambia shirika la habari la Reuters Jumanne kwamba waasi bado walikuwa mjini humo. Chanzo cha waasi kilisema kuwa M23 pamoja na majeshi ya Congo wangekubaliana kuondoka umbali wa kilomita tano (maili tatu) kutoka Uvira ili kuunda ukanda wa usalama, pendekezo ambalo M23 ilikuwa imelitoa kwenye mkutano na waandishi wa habari wiki iliyopita.

Serikali za Congo na Burundi hazikutoa ufafanuzi wowote kuhusu suala hilo.

Mnamo Januari, M23 ilifanya mashambulizi ya kushtukiza na kuteka miji miwili mikubwa zaidi mashariki mwa Congo, katika mapigano yaliyosababisha vifo vya maelfu ya watu na kuwafanya mamia ya maelfu kukimbia makazi yao.

Tangu wakati huo, waasi hao wamekuwa wakijaribu kuanzisha utawala mbadala katika eneo la mashariki, hali inayoweza kusababisha mgawanyiko wa kudumu katika taifa hilo kubwa la Afrika ya Kati.